Vuçiç ka dhënë dorëheqjen nga drejtimi i Partisë Progresive Serbe, teksa ka parlajmëruar lëvizje të re...
Presidenti serb Aleksandër Vuçiç ka mbledhur sot në një tubim mbështetësit e tij, në atë që mediat pranë e tij e quajnë tubimi më i madh në histori. Duke qenë se në dy protesta ka pasur qindra mijëra persona në shesh, Vuçiç tentoi të tregojë forcën. Por duket se në krahun e tij nuk ishte as natyra, kjo sepse para se të fliste presidenti, nisi një shi i rrëmbyeshëm dhe bëri që shumë njerëz të ikin.
Ndonëse kishte paralajmëruar se do e dërgojë vendin në zgjedhje, Vuçiç jo vetëm që nuk e artikuloi një gjë të tillë, por i shtriu opozitës dorën e dialogut.
“I ftoj në bisedë dhe dialog edhe ata politikanë, për të cilët mendoj më të keqen. Nga nesër dera ime është e hapur për secilin prej tyre, për të zgjidhur problemet në institucionet e sistemit”, tha Vuçiç.
Ai shtoi se problemet nuk zgjidhen në autostradë, duke aluduar në dy protestat e mëparshme qytetare, ku dhjetëra mijëra demonstrues bllokuan autostradën në urën Gazela në Beograd. Sipas tij, atyre politikanëve nuk u interesonin fëmijët, por si ta largojnë atë nga pushteti.
Megjithatë pati një zhvillim surprizë. Vuçiç tha se po fliste për herë të fundit si kryetar i SNS-së, duke paralajmëruar se do të japë dorëheqjen si kryetar partie.
“Për njëmbëdhjetë vjet, i shërbeva me besim dhe besnikëri shtetit dhe popullit tim. Unë kam qenë kryetar i Partisë Përparimtare Serbe për njëmbëdhjetë vjet. Nesër, dikush tjetër do të marrë në dorë Partinë Progresive Serbe time, tuajën, tonën”, tha Vuçiç.
Ai tha se nga e shtuna partinë e marrin “disa njerëz të mrekullueshëm” dhe se nga 28 qershori nisin formimin e Lëvizjes për popullin dhe shtetin. Pra duket se do krijojë parti ose lëvizje të re.
Ai u ndal dhe te tensionet sot në Kosovë. Gjatë fjalës së tij para militantëve, Vuçiç tha se aksioni i ditës së sotme nga Forcat Speciale të Kosovës ishte i planifikuar.
Presidenti serb ka deklaruar se pas tubimit, do të mbledhë Këshillin e Sigurisë Kombëtare për të diskutuar atë që ka ndodhur sot në veri të Kosovës. Më tej, ai ka kritikuar edhe shtetet e QUINT-it duke thënë se nëse do të kishin ndërhyrë situata nuk do të kishte shkuar deri në këtë gjendje që është tani.
“Sikur me dashje prisnin që njerëzit nga veriu i Kosovës të vinin në Beograd. U sulmuan ndërtesat komunale, dhe përfaqësuesit e QUINT-it heshtën për të gjitha këto, dhe tani po e dënojnë, kur shqiptarët kanë mbaruar punë. Nuk kemi pasur krizë më të madhe dhe më të rëndë. Sapo të përfundojë ky tubim do të kemi mbledhjen e Këshillit të Sigurisë Kombëtare, për të biseduar për atë që do të ndodhë në Kosovë dhe kam frikë që do të ndodhin shumë gjëra të këqija sepse e dimë me kë kemi të bëjmë”, tha Vuçiç. Ai madje, deklaroi se “nuk do të dorëzohen për Kosovën”.