FLASH
Shkruar nga Pamfleti
Konflikti mes Shteteve të Bashkuara dhe Iranit po hyn në një fazë të re përshkallëzimi, me sulme të reja amerikane pranë Ngushticës strategjike të Hormuzit, ndërsa vendet e Gjirit po marrin masa të shtuara sigurie nga frika e zgjerimit të luftës.
Komanda Qendrore e SHBA-së (CENTCOM) njoftoi se në orën 20:00 (me orën e Shqipërisë) nisi vala e pestë e sulmeve ndaj Iranit, me objektiv, sipas saj, "dobësimin e mëtejshëm të kapaciteteve ushtarake iraniane".
Mediat iraniane raportuan shpërthime në ishullin Qeshm, si edhe në qytetet Bandar Abbas dhe Chabahar, zona me rëndësi strategjike pranë hyrjes së Ngushticës së Hormuzit.
Ndërkohë, Ambasada e SHBA-së në Bagdad lëshoi një alarm sigurie për qytetarët amerikanë në Irak pas një sulmi me dron në Erbil. Në njoftimin zyrtar, ambasada përsëriti thirrjen që shtetasit amerikanë "të mos udhëtojnë në Irak për asnjë arsye", duke përmendur rrezikun nga terrorizmi, rrëmbimet, konflikti i armatosur dhe trazirat civile.
Në të njëjtën kohë, Katari hodhi poshtë raportimet e mediave izraelite se kishte rënë dakord të merrte pjesë në operacione ushtarake kundër Iranit. Në një deklaratë zyrtare, Doha i cilësoi këto pretendime "të rreme" dhe theksoi se nuk do të lejojë që ato të minojnë përpjekjet e saj diplomatike për t'i dhënë fund konfliktit.
Edhe Bahreini mori masa të jashtëzakonshme sigurie, duke kufizuar lëvizjen e të gjitha mjeteve lundruese në ujërat e tij territoriale nga ora 18:30 deri në orën 04:00, si masë parandaluese për shkak të tensioneve në rajon.
Zhvillimet e fundit tregojnë se përplasja mes Uashingtonit dhe Teheranit po zgjerohet, ndërsa shqetësimet për një konflikt më të gjerë rajonal vazhdojnë të rriten.
Lini një Përgjigje