FLASH
Shkruar nga Pamfleti
Presidenti amerikan vazhdon përplasjen publike me kryeministren italiane dhe e akuzon se ka ndryshuar qëndrim ndaj SHBA-së për interesa politike të brendshme.
Polemikat mes Donald Trump dhe Giorgia Melonit po thellohen, ndërsa presidenti amerikan ka publikuar një reagim të ri në rrjetin e tij social Truth Social, ku ka përsëritur akuzat ndaj kryeministres italiane.
Trump pretendon se gjatë samitit të G7 në Francë, Meloni ka insistuar disa herë për të realizuar një fotografi me të. Sipas presidentit amerikan, kërkesa lidhej me përpjekjen e saj për të përmirësuar pozitat politike në Itali, në një moment kur, sipas tij, mbështetja për qeverinë e saj është në rënie.
Në postimin e tij, Trump e kritikoi Melonin për qëndrimet që ka mbajtur ndaj Shteteve të Bashkuara në disa çështje ndërkombëtare. Ai përmendi kundërshtimin e Italisë për përdorimin e disa infrastrukturave ushtarake gjatë operacioneve kundër Iranit, si dhe mbrojtjen që kryeministrja italiane i ka bërë Papa Leonit pas kritikave të presidentit amerikan.
Sipas Trumpit, vendimet e marra nga qeveria italiane kanë krijuar vështirësi për interesat amerikane dhe kanë dëmtuar bashkëpunimin mes dy vendeve.
Deklarata e re vjen pas shkëmbimeve të forta publike mes dy liderëve në ditët e fundit, të cilat kanë nxjerrë në pah tensione të paprecedenta mes një prej aleatëve tradicionalë të Uashingtonit dhe administratës amerikane.
Postimi i plotë i Donald Trump:
“Kryeministrja italiane Giorgia Meloni më ka kërkuar vazhdimisht të bëjmë një foto gjatë samitit të G7 në Francë. Ajo po shkon dobët në Itali për sa i përket popullaritetit të saj, ndoshta sepse i ka kthyer shpinën Shteteve të Bashkuara të Amerikës, një vend që e do dhe e mbron vërtet Italinë, kur bëhej fjalë për të ndaluar Iranin nga zhvillimi i armëve bërthamore, por këtë e ka bërë edhe NATO, gjithsesi!
Ajo madje nuk na lejoi të përdorim pistat apo aeroportet e Italisë, gjë që ishte një pengesë e madhe logjistike, dhe kjo pavarësisht faktit se SHBA kontribuon me qindra miliarda dollarë çdo vit për të mbrojtur Italinë dhe aleatët e tjerë të NATO-s.
Tani, pasi Shtetet e Bashkuara e kanë mposhtur Iranin ushtarakisht, ajo dëshiron sërish të jetë mike për të rritur “numrat” e saj të popullaritetit. Jo, faleminderit”, ka shkruar presidenti Trump.
Lini një Përgjigje