FLASH
Shkruar nga Pamfleti
Një tjetër incident me pasojë vdekjen gjatë një operacioni të Shërbimit Amerikan të Emigracionit dhe Doganave (ICE) ka tronditur Shtetet e Bashkuara, duke shtuar presionin për më shumë transparencë dhe llogaridhënie ndaj agjentëve federalë.
Një person u vra të hënën në qytetin Biddeford, në shtetin e Maine, në një ngjarje ku u përfshinë agjentët e ICE, konfirmoi kryetari i Dhomës së Përfaqësuesve të Maine, Ryan Fecteau.
"Një person u vra. ICE ishte e përfshirë. Policia e Shtetit dhe Departamenti i Sigurisë Publike ndodhen në vendngjarje për të mbledhur informacion, ndërsa pritet që hetimet t'i marrë përsipër edhe FBI-ja", deklaroi Fecteau.
Autoritetet nuk kanë bërë ende publike identitetin e viktimës apo rrethanat e incidentit. Policia e Biddeford konfirmoi vetëm se bëhet fjalë për një "incident policor" dhe se nuk ka rrezik për komunitetin.
Ngjarja vjen vetëm pak ditë pasi Lorenzo Salgado Araujo, një emigrant meksikan që po shkonte në punë, u vra nga një agjent i ICE gjatë një ndalese në trafik në Hjuston. Fillimisht, autoritetet thanë se operacioni ishte i drejtuar ndaj tij, por më vonë pranuan se ai nuk ishte objektivi i aksionit.
Seria e incidenteve ka rikthyer në qendër të debatit metodat e përdorura nga agjentët federalë të emigracionit. Deputetja demokrate nga Maine, Chellie Pingree, reagoi ashpër pas ngjarjes, duke u shprehur se ishte "e tronditur dhe e zemëruar" dhe duke kërkuar një hetim të plotë mbi rastin.
"Pse jeni në Maine?", pyeti ajo, duke iu drejtuar publikisht agjentëve të ICE.
Në janar, administrata amerikane zhvilloi në Maine një operacion të gjerë kundër emigracionit të paligjshëm, të koduar "Operation Catch of the Day". Operacioni u kundërshtua nga organizatat për të drejtat e njeriut, ndërsa ACLU ngriti padi ndaj autoriteteve federale, duke i akuzuar për ndalimin e paligjshëm të një emigranti me status të rregullt.
Pas incidentit të së hënës, organizatat e shoqërisë civile kanë nisur mobilizimin. Lëvizja "Maine Resists" ka thirrur një protestë emergjente në Biddeford, ndërsa organizata Project Relief bëri të ditur se është në kontakt me familjen e viktimës.
Lini një Përgjigje