FLASH
Shkruar nga Pamfleti
Rivaliteti historik mes Barcelonës dhe Realit të Madridit ka kaluar kufijtë e fushës së lojës dhe po zhvendoset edhe në arenën ligjore. Tensionet mes dy klubeve janë përshkallëzuar pas vendimit të Barcelonës për të nisur procedura juridike kundër presidentit të Realit të Madridit, Florentino Perez.
Klubi katalanas njoftoi se ka paraqitur një kërkesë paraprake për pajtim, hap i domosdoshëm përpara ngritjes së një padie për shpifje, duke kërkuar që Perez të tërheqë deklaratat e tij lidhur me çështjen “Negreira”. Sipas Barcelonës, këto deklarata janë “të rreme, shpifëse dhe fyese” për imazhin dhe reputacionin e klubit.
Origjina e konfliktit lidhet me deklaratat që Florentino Perez bëri më 12 maj. Presidenti i Realit të Madridit tha se gjatë mandatit të tij klubi kishte fituar shtatë tituj kampion në La Liga, por sipas tij numri mund të kishte qenë dyfish më i madh, pasi shtatë tituj të tjerë “ishin vjedhur”. Kjo deklaratë u interpretua si një aludim se sukseset e Barcelonës ishin ndikuar nga korrupsioni i pretenduar në arbitrim, në kuadër të çështjes “Negreira”.
Fillimisht, drejtuesit e Barcelonës deklaruan se do të analizonin përmbajtjen e këtyre deklaratave për të vlerësuar mundësinë e veprimeve ligjore. Këtë javë, klubi konfirmoi se ekipi juridik kishte përgatitur dokumentacionin e nevojshëm për procedurat përkatëse.
Nëse Florentino Perez nuk tërheq deklaratat e tij, Barcelona paralajmëron se do të ndërmarrë hapin e radhës, duke depozituar një padi penale për shpifje. Një tërheqje e deklaratave konsiderohet e pamundur, pasi presidenti i Realit të Madridit ka deklaruar më herët se do ta ndjekë çështjen “Negreira” “deri në fund”.
Në deklaratën zyrtare, Barcelona bën të ditur se ka paraqitur kërkesën për pajtim sipas nenit 205 të Kodit Penal Spanjoll, me synimin që Florentino Perez të tërheqë deklaratat që, sipas klubit, ai i ka bërë duke e ditur se janë të pavërteta.
“Qëllimi i kësaj padie është të detyrojë Z. Perez të tërheqë disa deklarata që ai bëri duke i ditur ato si të rreme, deklarata që janë shpifëse dhe fyese për imazhin dhe reputacionin e Klubit”, thuhet në reagimin e Barcelonës.
Klubi katalanas thekson se, nëse procedura e pajtimit nuk sjell rezultat, do të vazhdojë me ngritjen e padisë penale përkatëse.
Lini një Përgjigje