FLASH
Shkruar nga Pamfleti
Automjeti i drejtuar nga Valentin Bluda, ka dalë nga rruga dhe është përplasur me një reklamë anësore.
Një aksident i rëndë ka tronditur Shkodrën pasditen e kësaj të shtune, ku dy persona, babë e bir, kanë humbur jetën në vendngjarje. Ngjarja ndodhi rreth orës 18:20 në aksin rrugor Shkodër–Hani i Hotit, pranë rrethrrotullimit të Koplikut.
Sipas njoftimit të policisë, automjeti i drejtuar nga Valentin Bluda, 32 vjeç, ka dalë nga rruga dhe është përplasur me një reklamë anësore. Përplasja rezultoi fatale për drejtuesin e makinës dhe për babain e tij, Nikoll Bluda, 76 vjeç, i cili udhëtonte si pasagjer. Të dy ndërruan jetë menjëherë në vendngjarje, pa i dhënë mundësi ndërhyrjes mjekësore.
Policia ka mbërritur në vendngjarje dhe ka nisur hetimet për të përcaktuar rrethanat e aksidentit. Dyshohet se shkak ka qenë humbja e kontrollit nga ana e drejtuesit të automjetit, por nuk përjashtohet mundësia që faktorë të tjerë si shpejtësia apo kushtet e rrugës të kenë ndikuar në tragjedi.
“Rreth orës 18:20, në aksin rrugor “Shkodër – Hani i Hotit”, automjeti me drejtues shtetasin V. B., rreth 32 vjeç, dyshohet se ka humbur kontrollin mbi drejtimin e automjetit dhe është përplasur me një reklamë në rrugë. Si pasojë e aksidentit, kanë humbur jetën në vendngjarje shtetasi V. B. dhe babai i tij, shtetasi N. B., 76 vjeç, pasagjer në automjet”, njofton policia.
Lini një Përgjigje