Kronike15 Shkurt 2024, 12:07

Nëna e re humbi jetën, Altin Çoku qesh dhe pretendon se është arrestuar kot; çfarë nuk u pa sot nga seanca gjyqësore

Shkruar nga Pamfleti
Nëna e re humbi jetën, Altin Çoku qesh dhe pretendon se
Altin Çoku

Ditën e sotme Gjykata Penale e Tiranës la në qeli Altin Çokun që akuzohet se shkaktoi vetëvrasjen e 27- vjeçares, Sibela Abedini në Kamëz.

Brenda kafazit ai i shprehu ngushëllime familjarëve të viktimës, por publikimin e fotove intime të vajzës që e çuan atë në aktin ekstrem ai ia faturoi një tjetër personi.

“Ka dalë në media, foton e ka nxjerrë shtetasi Jan Haxhia, sepse janë mesazhet në telefonin e vajzës. I shpreh ngushëllime familjes”, ka thënë Çoku brenda kafazit të qelqtë, aty ku u shfaq i buzëqeshur.

Çoku mohoi akuzat e ngritura ndaj tij dhe tha se ai ishte arrestuar kot nga policia.

“Jam arrestuar në mënyrë të paligjshme sepse dihet kush e ka bërë”, shtoi 39-vjeçari.

Por edhe pse një vajzë e re, një nënë që la jetime një vajzë të mitur vetëm 2-vjeç ka humbur jetën, në pamjet që u shfaqën nga gjykata u pa qartë se Altin Çoku nuk shfaqi asnjë shenjë pendese.

E shkuara e errët e Çokut

Por Altin Çoku, i njohur si një personazh i famshëm në rrjetin social Tik Tok, ka një të shkuar të errët mbi supe. Vite më parë, 39-vjeçari Altin Coku  ishte arrestuar nga policia, pasi kishte djegur me benzinë djalin e dajës së tij, pasi motra e këtij të fundit nuk pranonte të kishte lidhje me Çokun. Në atë kohë, ai ja hodhi paq burgut, pasi ekspertiza mjeko-ligjore e nxori atë me prapambetje mendore, ku gjykata ngarkoi të atin e tij për të ndjekur mjekimin e detyruar.

Çoku është dënuar nga ish-Gjykata e Krimeve të Rënda në vitin 2015, me 1 vit e 6 muaj burg pasi kërcënoi me jetë mjekun e tij psikiatër në vitin 2014. Ai i kërkonte atij shuma parash duke e kërcënuar se do të kishte gjakderdhje.

Çoku “mburrej” me raportin mjeko-ligjor

Raporti mjeko-ligjor që vërtetonte se ai vuante nga probleme të prapa mbetjes mendore kanë qenë arsyeja pse ai nuk ka bërë burg.

Për këtë gjë, ai “mburrej” në Tik Tok, duke thënë se maksimumi dy ditë burg do bëj çfarëdo që të ndodhë sepse kishte raport nga mjeku për shëndetin mendor.

“Kam raport unë, jam budalla, dy ditë burg bëj”, shprehej Çoku në rrjetin social Tik Tok.

Akuzat e familjarëve

Por familjarët e vajzës së re kanë hedhur dyshime se mund të ketë edhe persona të tjerë të përfshirë. Kjo për shkak se vëllai i Sibelës ka thënë se ka parë dy veta në pallat natën e ngjarjes, një sipër në tarracë dhe një tjetër poshtë pallatit. Nëna e 27-vjeçares për mediat deklaroi se nëse drejtësia nuk jep burgim të përjetshëm për Çokun, ajo do të bëjë vetëgjyqësi. Të njëjtën gjë kanë deklaruar edhe tezja dhe daja i 27-vjeçares një ditë pas ngjarjes së rëndë.

Kontakti i Çokut me viktimën

Familjarët e Sibela Abedinit kanë thënë gjithashtu për mediat se 27-vjeçarja nuk kishte asnjë kontakt intim me Çokun. Sipas tyre, ka qenë nëna e Sibelës ajo që ka shkuar për të pastruar banesën e 39-vjeçarit ditën e parë, dhe ditën e dytë ka shkuar vetëm Sibela, por nuk është paguar.

Kjo dëshmi e familjarëve hedh poshtë deklaratat e Çokut për një takim intim në hotle dhe mbi vërtetësinë e fotos intime që qarkulloi në Tik Tok.

Sibela Abedini ishte e martuar në Kosovë dhe kishte një vajzë të mitur, ndërsa prej një muaji ishte kthyer tek familja në Kamëz pas konflikteve me bashkëshortin.

Tashmë do të jenë hetimet e policisë, për të vërtetuar deklaratat e familjarëve dhe Altin Çokut, dhe shkakun e vdekjes së 27-vjeçares.

altin Çoku