FLASH
Shkruar nga Pamfleti
Zbardhen detaje nga ngjarja e rënë në Divjakë ku 25-vjeçari Xhesion Toromeni goditi për vdekje me thikë 32-vjeçarin Besmir Kumria, pas sherrit për një kanal vaditës.
Xhesion Toromeni kishte vetëm disa ditë që ishte kthyer në fshatin kryekuq të Divjakës, pasi jetonte prej 7 vitesh në Itali. Mesnatën e së martës ai shkoi në lokalin e fshatit ku Besmir Kumria po qëndronte me miqtë e tij.
Pa thënë asnjë fjale, Toromeni ka zbritur nga makina me thikë në dorë dhe ka sulmuar për vdekje bashkëfshatarin e tij. Viktima nuk e ka njohur autorin, ndërsa ky i fundit e goditi dy herë me thikë në pjesën e barkut.
32-vjeçari tentoi të largohej, por pas disa metrash ka rënë përtokë i vdekur, ndërsa autori u largua me automjetin e tij, gjakftohtë.
Tre orë më pas, në tentative për t’u larguar drejt Fierit, vrasësi iu përgjigj telefonatës së efektiveve të policisë duke u treguar vendndodhjen e tij.
Gjatë arrestimit ai i tha policëve se Besmiri ka goditur me shpullë babain e tij dy vjet më parë.
Konflikti mes familjeve Kumria dhe Toromeni në Kryekuq të Divjakës, është i hershëm dhe ka nisur për radhën e vaditjes se parcelave bujqësore me ujin e kanalit vaditës. Dy vite me parë, ky ishte motivi i deklaruar nga anëtarët e familjeve në komisariatin e policisë Divjakë, ku përfunduan pas një konflikti fizik mes tyre.
Burimet nga ky komisariat thanë se konflikti ishte i njohur për policinë dhe se dy vjet më parë janë proceduar penalisht anëtarë nga të dyja familjet.
Banesat e familjes së autorit dhe të viktimës, i ndan vetëm rruga e fshatit kryekuq. Përveçse fqinj, familjet Toromeni dhe Kumria kanë edhe lidhje krushqie.
Konflikti për ujin e tokës është zhvilluar mes anëtarëve të moshuar të familjes kurse të rinjtë, si autori ashtu edhe viktima kanë jetuar dhe punuar larg vendlindjes.
Besmir Kumria punonte si elektriçist në zonën e Himarës së bashku me vëllain ndërsa vrasësi i tij për 7 vjet nuk kishte shkelur në Kryekuq.
Ky i fundit mbërriti disa ditë më parë për arsye ende të paqarta, por burime pranë të afërmve te tij citojnë te riun të këtë thënë: “Nuk më zë gjumi që prej dy vitesh kur më qëlluan babain me shpullë”.
Policia po merr në pyetje dëshmitarë dhe anëtarët e dy familjeve për të dokumentuar ngjarjen, rrethanat dhe motivin.
Bashkëfshatari i familjeve Kumria dhe Toromoni thotë se shkak i konfliktit mes dy familjeve është toka.
Paraprakisht policia e Fierit ka ngritur dy akuza ndaj 25-vjecarit, “vrasje me paramendim” dhe “mbajtje pa leje e armeve te ftohta”. Ndërsa policia vijon hetimet lidhur me ngjarjen.
Lini një Përgjigje