FLASH
Shkruar nga Diplomatico | Pamfleti.net
Kushtetuta rrëzon Trump-in: Tarifat, jashtë ligjit, Proteksionizmi përplaset me drejtësinë amerikane...
Një goditje e papritur ka ardhur nga sistemit amerikan i drejtësisë, që mund të ndryshojë kursin e politikës ekonomike proteksioniste të ndjekur nga presidenti Donald Trump. Një gjykatë federale ka vendosur se tarifat që ai vendosi mbi pothuajse çdo vend, në emër të një emergjence kombëtare, ishin një tejkalim i autoritetit të tij si President.
Ky vendim mund të konsiderohet si një nga dështimet më të thella politike dhe ligjore të Trump, pasi sfidon thelbësisht politikën e tij të jashtme dhe ekonomike, të njohur si "America First".
Shkelje e kompetencave presidenciale
Sipas vendimit të gjykatës, Trump ka përdorur një ligj emergjent për të vendosur tarifa ndaj vendeve të ndryshme pa justifikim të mjaftueshëm ligjor. Ky akt është interpretuar si një përpjekje për të anashkaluar Kongresin dhe për të ushtruar pushtet absolut në fushën e tregtisë.
Ky vendim e vendos për herë të parë në pikëpyetje përputhshmërinë kushtetuese të politikave proteksioniste të Shtëpisë së Bardhë gjatë presidencës Trump.
Fundi i narrativës proteksioniste?
Tarifat e vendosura nga Trump ishin bërë simbol i fushatës së tij elektorale dhe Presidencës, duke synuar "mbrojtjen" e prodhuesve amerikanë nga konkurrenca kineze, evropiane apo meksikane. Tani, me vendimin e gjykatës, kjo linjë politike rrëzohet si e papajtueshme me ligjin dhe me parimet themelore të ndarjes së pushteteve.
Administrata e Trump ka deklaruar se do ta apelojë vendimin, duke pretenduar se "nuk është detyrë e gjyqtarëve të vendosin si të trajtohet një emergjencë kombëtare". Por ky reagim duket më shumë si shfajësim politik se sa si kundërargument ligjor.
Pasojat në arenën globale
Kjo goditje ligjore ndaj Trump ka jehonë edhe në tregtinë globale. Partnerët ekonomikë të SHBA mund të jenë më të kujdesshëm ndaj politikave amerikane, në pritje të qartësisë juridike. Kjo ka ndikim edhe mbi Shqipërinë dhe rajonin e Ballkanit, që varen nga stabiliteti ekonomik euro-atlantik dhe nga politikat tregtare të BE-së, e cila çdoherë reagon ndaj politikave të SHBA-së.
Si përfundim,
Vendimi i fundit i gjykatës amerikane nuk është vetëm një dështim për Trump-in, por një sinjal që politika proteksioniste në SHBA ka arritur kufijtë e saj. Çdo pretendim për vendimmarrje të centralizuar mbi ekonominë në emër të "interesit kombëtar" do të duhet të kalojë në filtër të drejtësisë./Pamfleti
Lini një Përgjigje