FLASH
Shkruar nga PamfletiBrenda 45 ditësh Kosova duhet të mbajë zgjedhje që llogariten të jenë rreth fillimit të qershorit.
Kuvendi i Kosovës dështoi të zgjedhë mbrëmë Presidentin e ri dhe kryetarja e Kuvendit Albulena Haxhiu tha se pas pamundësisë së gjetjes së një marrëveshjeje “Kuvendi shpërndahet” dhe vendi do të shkojë në zgjedhje të reja.
Kryeministri Albin Kurti tha në sallën e Kuvendit se opozita nuk pati asnjë vullnet për të arritur një marrëveshje.
“I provuam të gjitha”, tha Kurti që renditi një sërë ofertash që i kishte bërë opozitës.
Pas shpërndarjes së Kuvendit, ka ardhur edhe reagimi i parë nga ekipi i ish-Presidentes Vjosa Osmani.
Këshilltarja e Osmanit, Egnesa Vitija, ka publikuar një foto të Osmanit, teksa ka shkurar “Shihemi”.
Në fjalimin që mbajti dje, kryeministri Albin Kurti sulmoi Vjosa Osmanin, ku tha se tentoi shpërndarjen e Kuvendit me dekret jokushtetues.
Brenda 45 ditësh vendi duhet të mbajë zgjedhje që llogariten të jenë rreth fillimit të qershorit.
Sipas Kushtetutës, presidenti zgjidhet me dy të tretat e votave në dy raundet e para, ose me 61 vota në raundin e tretë, por me kushtin që në sallë të jenë të paktën 80 deputetë. Kjo e bën të domosdoshme një marrëveshje mes partive, pasi asnjëra nuk i ka e vetme votat e nevojshme.
Më 4 prill 2021, Kuvendi i Kosovës e zgjodhi Vjosa Osmanin presidente me 71 vota, për një mandat pesëvjeçar, si kandidate e propozuar nga Lëvizja Vetëvendosje. Kuorumi u sigurua edhe nga Lidhja Demokratike e Kosovës, ndonëse kjo e fundit ndodhej në opozitë.
Megjithatë, marrëdhënia politike mes Osmanit dhe Kurtit ndryshoi me kalimin e viteve. Me afrimin e fundit të mandatit, Osmani shprehu publikisht ambicien për një mandat të dytë, por këtë herë nuk mori mbështetjen e Vetëvendosjes, e cila nuk e propozoi fare si kandidate.
Kryeministri Kurti e justifikoi këtë qëndrim me mungesën e votave të nevojshme në Kuvend, duke argumentuar se Osmani nuk do të arrinte të siguronte 80 votat e domosdoshme në fazat e para të votimit. Në vend të saj, Vetëvendosje propozoi emra të tjerë, si Glauk Konjufca dhe Fatime Kollçaku.
Seanca e 5 marsit, që përbënte edhe afatin e fundit kushtetues për zgjedhjen e presidentit, dështoi për shkak të mungesës së kuorumit, pasi opozita braktisi sallën. Kryetarja e Kuvendit, Albulena Haxhiu, e shpalli seancën të mbyllur, por jo të përfunduar.
Një ditë më pas, më 6 mars, Osmani dekretoi shpërndarjen e Kuvendit, duke argumentuar se përfaqësuesit “vendosën ta çojnë vendin në zgjedhje”.
Ajo theksoi se “po kryej detyrimin kushtetues… është fatkeqësi e madhe që deputetët nuk zgjodhën interesin e Kosovës”.
Që prej asaj dite Osmani është shfaqur në Gjilan, Istog, Suharekë, Pejë, Gjakovë, Deçan etj duke ngjallur pyetjen a po përgatitet ajo për një rikthim në garën politike?
Këtë përgjigje do ta mësojmë 45 ditëshin e ardhshëm!
Lini një Përgjigje