FLASH
Shkruar nga Pamfleti
Aktori Kevin Spacey ka deklaruar se beson se karriera e tij po rikthehet gradualisht, pas disa vitesh të vështira të shënuara nga akuzat për ngacmim dhe sulm seksual, të cilat patën ndikim të madh në jetën personale dhe profesionale.
Në një intervistë në podcast-in "Club Random", Spacey u shpreh se ndien se perceptimi i publikut ndaj tij ka filluar të ndryshojë, sidomos pasi është shpallur i pafajshëm në proceset gjyqësore ku u përball me akuza të ndryshme.
Duke folur për sjelljen e tij në të kaluarën, aktori pranoi se në disa raste kishte tejkaluar kufijtë me flirtin, por mohoi se ishte personi që është portretizuar në opinionin publik.
"Unë kurrë nuk kam thënë se nuk ka pasur 'zjarr'. Thjesht nuk ka qenë një zjarr i madh. Kam flirtuar me shumë burra", tha Spacey, duke shtuar se një pjesë e akuzave, sipas tij, janë ekzagjeruar ose shtrembëruar.
Ai komentoi edhe çështjen e ngritur nga aktori Anthony Rapp, duke kujtuar se një gjykatë në New York vendosi se ai nuk mbante përgjegjësi civile për pretendimet e ngritura ndaj tij.
Spacey tregoi se pas shpërthimit të skandalit humbi pothuajse gjithçka, përfshirë rolin në serialin "House of Cards", projektet në Hollywood dhe shtëpinë e tij.
Megjithatë, ai tha se vitet e fundit ka rifilluar punën në filma evropianë dhe produksione të pavarura, duke e konsideruar këtë si një hap drejt rikthimit në industrinë e kinemasë.
Gjatë intervistës, aktori foli edhe për orientimin e tij seksual, duke pranuar se për shumë vite e mbajti të fshehtë faktin që ishte homoseksual, edhe pse, sipas tij, njerëzit më të afërt e dinin tashmë.
Lini një Përgjigje