Sport16 Tetor 2023, 22:54

Kualifikueset ‘Euro 2024’/ Portugalia “shkatërron” Bosnjën, penalltia ‘shpëton’ Holandën përballë Greqisë!

Shkruar nga Pamfleti

Kualifikueset ‘Euro 2024’/ Portugalia “shkatërron”

Portugalia e Cristiano Ronaldos ka fituar me rezultatin e thellë 5-0 ndaj Bosnjës. Të pestë golat u shënuan që në pjesën e parë dhe luzitanët e morën me qetësi intervalin e dytë të ndeshjes. Me këtë fitore, Portugalia e mbyll me pikë të plota grupin dhe këtë fazë kualifikuese të Euro 2024.

Ndërkohë që Holanda ka arritur të marrë një fitore të rëndësishme ndaj Greqisë në “frymën e fundit”. “Tulipanët” fituan me një penallti në minutën e 91’, me  Van Dijk i cili e dërgoi topin në rrjetë duke i dhënë një fitore me vlerë të madhe kombëtares së tij. Me këtë rezultat, Holanda tashmë ndodhet në vendin e dytë në grup me 12 pikë, po aq sa Greqia e vendit të tretë. Greqia e ka ndeshjen e fundit kundër Francës, ndërsa Holanda ka edhe dy ndeshje të mbetura në kualifikueset e Euro 2024.

Ndërsa ndeshja mes Belgjikës dhe Suedisë është ndërprerë para kohe, pasi një sulm terrorist ndodhi këtë mbrëmje në Bruksel ku një person i armatosur la të vdekur të paktën dy shtetas suedezë të cilët kishin ardhur për të parë sfidën. Këtë vendim e morën vetë lojtarët suedezë.

euro 2024 portugalia holanda