Shkruar nga Pamfleti
Fredi Beleri ka qenë dëshmitar në gjyqin që i është bërë në Greqi të shumëkërkuarit nga drejtësia shqiptare, Bledar Jambelli.
Deklaratën e fortë e bëri gazetarja Klodiana Lala, e cila tha se disponon edhe dëshminë e Belerit në gjyqin grek për Jambellin.
Mbetet e paqartë se përse është thirrur pikërisht Beleri në gjyqin ndaj një personazhi që konsiderohet tepër i rrezikshëm i botës së krimit, dhe se çfarë ka deklaruar.
Bledar Jambelli akuzohet se është personi që ka porositur Mikel Shallarin të ekzekutojë kryekomisarin e policisë Artan Cuku.
Jambelli, i njohur ndryshe si Rikard Muho, nga fshati Mbrostar i Fierit konsiderohet si vrasës me pagesë. Ai u ndalua në vitin 2019 në Greqi por shteti helen refuzoi ta ekstradojë.
Në atë kohë u përfol në media se autoritetet shqiptare kishin neglizhuar dhe vonuar qëllimisht procedurat për ekstradimin e tij.
Jambelli ra sërish në prangat e policisë greke në korrik të vitit 2022, së bashku me Kristaq Lecin, pasi dyshohen si të përfshirë në një përplasje me armë mes bandave ku mbetën të plagosur tre persona.
