FLASH
Shkruar nga Pamfleti
Policia e Shtetit ka reaguar pas denoncimit të kreut të Grupit Parlamentar të PD, Gazment Bardhi, i cili tha se po ushtrohet presion ndaj familjarëve të kandidates për deputete të PD në Fier, Silva Hasaj.
Sipas policisë, këto deklarata janë të pavërteta pasi xhaxhi i kandidates Silva Hasaj, Agim Hasaj u kap me bllok emrash për vota. Pas kësaj, Agim Hasaj u referua në Prokurori.
Policia njoftoi gjithashtu se gjatë kontrollit fizik ndaj këtij shtetasi dhe kontrollit në automjetin me të cilin ai udhëtonte, u gjet një bllok me shënime në lidhje me procesin zgjedhor. Pas shoqërimit dhe marrjes së deklarimit, ai u la i lirë.
“Sqarojmë opinionin publik se në lidhje me statusin e publikuar nga drejtuesi politik i Partisë Demokratike, për qarkun Fier, z. G. B., në të cilin ai ka pretenduar se Policia e Shtetit ka ushtruar presion ndaj familjarëve të kandidates për deputete të Partisë Demokratike, znj. S. H., (shtetasi A. H. që u shoqërua, i afërm i saj), theksojmë se pretendimi është i pavërtetë pasi Policia për këtë rast ka kryer të gjitha veprimet procedurale konform ligjit dhe materialet janë referuar në Prokurori.
Policia e Shtetit garanton qytetarët dhe të gjitha subjektet politike se është tërësisht e baraslarguar nga subjektet politike dhe e fokusuar vetëm në zbatimin e ligjit, garantimin e rendit e sigurisë përgjatë fushatës elektorale dhe paprekshmërinë e votës”, thuhet në reagimin e Policisë.
Lini një Përgjigje