FLASH
Shkruar nga Pamfleti
Pas disa orësh marshim në rrugët e kryeqytetit, protestuesit janë rikthyer para godinës së Kryeministrisë, duke mbyllur edhe ditën e 28-të të revoltës qytetare kundër qeverisë dhe klasës politike.
Pasi u nisën nga Kryeministria, qytetarët kaluan fillimisht në Unazë, më pas në zonën e Ish-Bllokut dhe u kthyen përgjatë Bulevardit "Dëshmorët e Kombit", për t'u rikthyer në pikën ku nisi tubimi, te Kryeministria.
Gjatë rrugës, një pjesë e protestuesve u larguan, ndërsa qindra të tjerë vijuan marshimin deri në fund, duke shoqëruar kolonën me flamuj kuqezi dhe brohoritje të pandërprera patriotike.
Edhe në kilometrat e fundit të marshimit nuk munguan thirrjet që kanë shoqëruar protestën përgjatë katër javëve të fundit, si "Rama jep dorëheqjen", "Rama ik", "Shqipëri e re", "Rama në burg" dhe "Berisha në burg".
Me rikthimin para Kryeministrisë, atmosfera u shoqërua me këngë dhe thirrje patriotike, ndërsa protestuesit valëvitën flamujt kombëtarë dhe përsëritën se protesta do të vijojë deri në plotësimin e kërkesave të tyre.
Organizatorët deklaruan se revolta qytetare nuk do të ndalet, duke theksuar se lëvizja, e cila nisi si një protestë për mbrojtjen e Zvërnecit, është shndërruar tashmë në një lëvizje mbarëkombëtare kundër qeverisë dhe gjithë kastës politike.
Lini një Përgjigje