FLASH
Shkruar nga Pamfleti
Një nga momentet më të spikatura të protestës së 14-të radhazi para Kryeministrisë ishte shpalosja e një banderole gjigante nga protestues të ardhur nga diaspora shqiptare, ku u paraqitën gjashtë kërkesa kryesore drejtuar qeverisë dhe faktorit ndërkombëtar.
Mes pjesëmarrësve ishte edhe një protestues i ardhur nga Italia, i cili shprehu mbështetjen e tij për atë që e cilësoi si revoltë qytetare dhe prezantoi publikisht kërkesat e diasporës shqiptare.
Në banderolën e vendosur përballë Kryeministrisë ishin renditur gjashtë pika kryesore:
-dorëheqja e menjëhershme e qeverisë,
-burg dhe konfiskim pasurish për zyrtarët përgjegjës,
-ndryshimi i Kodit Zgjedhor,
-krijimi i një qeverie teknike,
-fillimi i një procesi të ri demokratik
-monitorim e auditit ndërkombëtar.
Banderola tërhoqi vëmendjen e protestuesve dhe kalimtarëve, ndërsa pamjet e saj u shpërndanë gjerësisht në rrjetet sociale gjatë zhvillimit të tubimit.
Gjatë fjalës së tij, protestuesi nga diaspora ndaloi edhe te roli i artistëve, duke i kritikuar ata për mungesën e mbështetjes ndaj protestës. Ai deklaroi se qytetarët i kanë mbështetur artistët ndër vite përmes koncerteve dhe aktiviteteve të tyre, ndërsa i akuzoi se po qëndrojnë larg reagimit publik në një moment që, sipas tij, kërkon angazhim qytetar.
Shpalosja e platformës së diasporës u shoqërua me duartrokitje dhe thirrje nga pjesëmarrësit, ndërsa organizatorët e konsideruan atë një përmbledhje të kërkesave kryesore që po artikulohen prej javësh në protestat e zhvilluara në Tiranë.
Lini një Përgjigje