FLASH
Shkruar nga Pamfleti
Dhjetë persona janë vrarë dhe të paktën 76 të tjerë kanë mbetur të plagosur si pasojë e sulmeve me dronë dhe raketa ruse në Ukrainë gjatë 24 orëve të fundit.
Mediat ndërkombëtare raportojnë se viktimat janë regjistruar në pesë rajone të ndryshme, ndërsa Moska vazhdon të shënjestrojë qytetet ukrainase me sulme të rregullta ajrore.
Autoritetet ukrainase bëjnë të ditur se një raketë balistike dhe rreth 270 dronë janë lëshuar nga Rusia, megjithëse shumica janë interceptuar nga mbrojtja ajrore.
Në rajonin e Khersonit janë raportuar tre viktima në incidente të ndara, ndërsa nga dy persona kanë humbur jetën në Odesa, Donetsk dhe Zaporizhzhia. Një viktimë është regjistruar edhe në rajonin e Sumit.
Ndërkohë, presidenti ukrainas Volodymyr Zelensky deklaroi se një terminal nafte në veriperëndim të Rusisë është dëmtuar rëndë dhe se dy anije cisternë ruse janë goditur pranë portit të Novorossiyskut në Detin e Zi. Ai i cilësoi këto anije si pjesë e “flotës në hije”, që sipas tij përdoret për të shmangur sanksionet ndërkombëtare.
Nga ana tjetër, Rusia pretendon se Ukraina ka lëshuar të paktën 334 dronë drejt territorit të saj, duke shënjestruar veçanërisht rajonin e Leningradit. Sulmet ukrainase në javët e fundit kanë synuar kryesisht infrastrukturën energjetike ruse, përfshirë terminalet e eksportit të naftës.
Lini një Përgjigje