FLASH
Shkruar nga Pamfleti
Ushtria polake mësoi nga mediat për vendimin e Pentagonit, megjithëse paralajmërimi kishte mbërritur disa ditë më herët në sistemin e komunikimit të shefit të Shtabit të Përgjithshëm...
Polonia u përball me befasi të mërkurën pasi Shtetet e Bashkuara pezulluan një dislokim të planifikuar të trupave amerikane në territorin polak. Megjithatë, sipas burimeve pranë Shtabit të Përgjithshëm të Ushtrisë Polake, paralajmërimi për këtë vendim kishte mbërritur që të hënën në një sistem komunikimi të klasifikuar ushtarak.
Sipas tre personave të afërt me shefin e Shtabit të Përgjithshëm, gjeneralin Wiesław Kukuła, mesazhi amerikan mbeti i paaksesuar në emailin e tij të klasifikuar. Për pasojë, drejtuesit politikë të Ministrisë së Mbrojtjes dhe pjesa më e madhe e ushtrisë polake e morën vesh lajmin nga raportimet e mediave amerikane.
Mesazhi i dërguar nga pala amerikane njoftonte pezullimin e rotacionit të më shumë se 4 mijë ushtarëve të Brigadës së Dytë të Blinduar të Divizionit të Parë të Kavalërisë. Vendimi u raportua fillimisht nga “Army Times” dhe më pas u konfirmua nga përfaqësues të ushtrisë amerikane, të cilët nuk dhanë arsye publike për ndryshimin e planeve.
Pentagoni deklaroi se vendimi ishte pjesë e një procesi të planifikuar dhe jo një ndryshim i minutës së fundit. Zëdhënësi në detyrë i Pentagonit, Joel Valdez, tha se vendimi ishte marrë pas konsultimeve në disa nivele të komandës ushtarake amerikane në Evropë.
Zëvendëskryeministri dhe ministri polak i Mbrojtjes, Władysław Kosiniak-Kamysz, reagoi publikisht duke siguruar se pezullimi i këtij rotacioni nuk nënkupton tërheqje të përhershme të trupave amerikane nga Polonia. Ai deklaroi se kishte zhvilluar bisedime me gjeneralin amerikan Alexus Grynkewich, komandant i forcave amerikane në Evropë dhe komandant suprem i NATO-s për Evropën.
Megjithatë, çështja ka nxjerrë në pah probleme serioze në rrjedhën e informacionit brenda strukturave ushtarake polake. Sipas burimeve të cituara në raport, vetëm shefi i institucionit ka të drejtë të lexojë korrespondencën e klasifikuar, çka mund të ketë shkaktuar vonesën në shpërndarjen e informacionit.
Ish-shefi i Shtabit të Përgjithshëm polak, gjenerali në pension Mieczysław Cieniuch, tha se një informacion me rëndësi të tillë duhej t’i ishte përcjellë ministrit të Mbrojtjes brenda një dite, për shkak të ndikimit jo vetëm ushtarak, por edhe politik. Ndërkohë, gjenerali në pension Jarosław Gromadziński vlerësoi se sistemi i komunikimit brenda Shtabit të Përgjithshëm “ka pësuar një dështim të thellë”.
Sipas raportit, vetëm pasi lajmi u publikua në media të mërkurën, gjenerali Kukuła informoi drejtuesit e komandave ushtarake për pezullimin e transferimit të trupave amerikane. Disa burime ushtarake paralajmëruan se prania amerikane në Poloni mund të reduktohet, megjithëse jo domosdoshmërisht në shkallën e raportuar fillimisht nga mediat.
Shkrimi në Politico
Shefi i Shtabit të Përgjithshëm të Forcave të Armatosura të Polonisë kishte marrë një njoftim që të hënën, por pjesa më e madhe e ushtrisë polake e mësoi nga mediat se dislokimi amerikan ishte pezulluar.
Polonia u përball me befasi të mërkurën nga vendimi i papritur i Shteteve të Bashkuara për të anuluar një dislokim të planifikuar të trupave amerikane në vend. Por rezulton se paralajmërimi kishte mbërritur disa ditë më herët.
Ushtria polake ishte njoftuar për vendimin e Pentagonit që të hënën, sipas tre personave që kanë dijeni për çështjen dhe që bëjnë pjesë në rrethin e afërt të shefit të Shtabit të Përgjithshëm të Forcave të Armatosura Polake, gjeneralit Wiesław Kukuła, i cili kishte marrë njoftimin.
Megjithatë, mesazhi mbeti i bllokuar në emailin e klasifikuar të gjeneralit Kukuła. Si pasojë, drejtuesit e Ministrisë së Mbrojtjes dhe pjesëtarët e ushtrisë polake e morën vesh nga mediat ndryshimin e planeve të aleatit më të rëndësishëm të vendit.
Mesazhi i dërguar gjeneralit Kukuła në fillim të javës njoftonte se Ushtria Amerikane po pezullonte rotacionin e planifikuar në Poloni të më shumë se 4 mijë ushtarëve nga një brigadë e blinduar. Lajmi u raportua fillimisht të mërkurën nga media “Army Times”, e cila shkruante se vendimi prekte Brigadën e Dytë të Blinduar Luftarake të Divizionit të Parë të Kavalërisë. Raporte të ngjashme u publikuan edhe nga media të tjera amerikane.
Përfaqësues të ushtrisë amerikane konfirmuan më pas ndryshimin e planeve për dislokimin e trupave në Poloni, por nuk dhanë arsye për vendimin.
Pentagoni e mbrojti më vonë këtë hap, duke e cilësuar pjesë të një procesi të mirëllogaritur. “Vendimi për të tërhequr trupat pason një proces gjithëpërfshirës dhe shumështresor, që përfshin vlerësime nga drejtues kyç të forcave amerikane në Evropë dhe nga i gjithë zinxhiri komandues”, deklaroi zëdhënësi në detyrë i Pentagonit, Joel Valdez, duke shtuar “ky nuk ishte një vendim i papritur apo i marrë në minutën e fundit.”
Të mërkurën në mbrëmje, zëvendëskryeministri i Polonisë, Władysław Kosiniak-Kamysz, komentoi vendimin amerikan në rrjetet sociale, duke siguruar publikun se masa nuk nënkupton ulje të numrit të trupave amerikane në Poloni.
Të enjten, Kosiniak-Kamysz deklaroi në një konferencë për shtyp se kishte zhvilluar konsultime me gjeneralin amerikan Alexus Grynkewich, komandant i forcave amerikane në Evropë dhe komandant suprem aleat i NATO-s për Evropën, lidhur me vendimin e Pentagonit. Sipas tij, komandanti amerikan e kishte siguruar se pezullimi i dislokimit nuk do të thotë reduktim i përhershëm i pranisë ushtarake amerikane në Poloni.
Kosiniak-Kamysz tha gjithashtu se kishte qenë në kontakt të vazhdueshëm për çështjen me presidentin polak Karol Nawrocki dhe me kryeministrin Donald Tusk.
Befasi e plotë
Megjithëse çështja lidhet drejtpërdrejt me ushtrinë, gjenerali Kukuła nuk ka komentuar publikisht. Ai nuk mori pjesë as në konferencën për shtyp të së enjtes ku ministri i Mbrojtjes trajtoi këtë temë.
Të mërkurën, drejtuesit politikë polakë u gjendën plotësisht të papërgatitur nga vendimi i aleatit transatlantik. Por, sipas tre personave me dijeni për çështjen, në të njëjtën kohë kur Pentagoni po informonte komandantët e Brigadës së Dytë të Blinduar se nuk do të dërgohej në Poloni, një mesazh i shkurtër ishte dërguar edhe te shefi i Shtabit të Përgjithshëm të Ushtrisë Polake, gjenerali Kukuła.
Sipas këtyre burimeve, amerikanët e kishin dërguar njoftimin të hënën ose të martën përmes një sistemi komunikimi të klasifikuar të përdorur për kontaktet me aleatët. Vetëm gjenerali Kukuła kishte autoritet për të miratuar dhe lexuar komunikimet.
“Shefi i shtabit nuk e informoi stafin komandues deri të mërkurën”, tha një prej burimeve, i cili foli në kushte anonimiteti për shkak të natyrës jo publike të komunikimeve.
“Amerikanët e informuan Shtabin e Përgjithshëm në fillim të javës për pezullimin e rotacionit, pasi ai është përgjegjës për koordinimin e pranisë së forcave amerikane në Poloni”, tha një tjetër burim.
Por koloneli Marek Pietrzak, zëdhënës i Shtabit të Përgjithshëm, kundërshtoi pretendimin se mesazhi kishte mbërritur që të hënën.
“Asnjë informacion për pezullimin e rotacionit të forcave amerikane nuk është marrë nga Shtabi i Përgjithshëm të hënën”, deklaroi Pietrzak, duke shtuar “komenti im për këtë çështje: ndryshoni burimet tuaja.”
“Mesazh me një fjali”
Mesazhi amerikan lidhur me transferimin e ushtarëve të Brigadës së Dytë të Blinduar nga Teksasi në Poloni ishte jashtëzakonisht i shkurtër dhe nuk përmbante as shpjegime, as arsyetime.
“Ishte një mesazh i shkurtër, me një fjali, i dërguar përmes kanaleve rutinë ushtarake në mënyrë informale”, tha një prej personave pranë shefit të Shtabit të Përgjithshëm.
“Ajo që ndodhi në shtab është një rrëmujë tipike organizative”, tha një tjetër burim pranë Shtabit të Përgjithshëm, duke shtuar se “ligji për mbrojtjen e informacionit të klasifikuar përcakton se vetëm drejtuesi i institucionit mund të lexojë korrespondencën e klasifikuar. Megjithatë, nevojiten zgjidhje praktike që institucioni të funksionojë dhe të ruajë vazhdimësinë”.
“Dihet që shefi i shtabit është shpesh jashtë dhe ka një ngarkesë të madhe pune. Prandaj ai duhet të autorizojë persona të tjerë për të lexuar korrespondencën e klasifikuar, në mënyrë që ajo të kontrollohet disa herë në ditë dhe jo vetëm kur ai gjen kohë”, shtoi burimi.
Në këtë rast, vonesa në leximin e mesazhit bëri që drejtuesit civilë të Ministrisë së Mbrojtjes ta mësonin pezullimin e rotacionit të trupave amerikane nga mediat amerikane të mërkurën në mbrëmje.
“Nuk e di çfarë sistemi komunikimi ekziston aktualisht mes shefit të shtabit dhe ministrit të Mbrojtjes, apo sa shpesh ai e informon ministrin”, tha gjenerali në pension Mieczysław Cieniuch, i cili drejtoi Shtabin e Përgjithshëm nga viti 2010 deri në vitin 2013.
“Në të kaluarën, për çështje të rëndësishme, shefi i shtabit kishte akses te ministri 24 orë në ditë. Për çështjet rutinë, ai e informonte ministrin një herë në javë”, tha ai. Në vijim ai theksoi se “nëse informacioni nga amerikanët kishte mbërritur të hënën, atëherë ministri i Mbrojtjes duhej të ishte informuar më së voni të marten”.
“Problemi qëndron te mënyra se si ky informacion u klasifikua brenda Shtabit të Përgjithshëm. Sipas mendimit tim, ai duhej konsideruar shumë i rëndësishëm dhe t’i përcillej urgjentisht ministrit të Mbrojtjes, sepse kishte jo vetëm dimension ushtarak, por edhe politik”, shtoi Cieniuch.
“Sistemi i qarkullimit të informacionit në Shtabin e Përgjithshëm ka pësuar kohët e fundit një dështim të thellë dhe nuk funksionon më, siç e tregoi qartë rasti i brigadës amerikane”, deklaroi gjenerali në pension Jarosław Gromadziński, i cili ka shërbyer për vite me radhë në Shtabin e Përgjithshëm, së fundmi në vitin 2023.
Sipas burimeve, vetëm pasi lajmi doli në media të mërkurën, gjenerali Kukuła u dërgoi një mesazh drejtuesve të komandave ushtarake duke i informuar se transferimi i trupave nga SHBA ishte pezulluar.
“Që nga ai moment, oficerët janë në dijeni dhe po punojnë për çështjen”, tha një prej burimeve, duke shtuar se prania ushtarake amerikane në Poloni do të reduktohet, në kundërshtim me deklaratat e mëparshme të gjeneralit Grynkewich.
“Ndoshta shkalla e reduktimit nuk do të jetë aq e madhe sa raportojnë mediat, por edhe ne kemi marrë atë informacion”, tha burimi. “Të gjithë jemi të zemëruar që po i mësojmë këto gjëra nga mediat dhe jo nga eprorët tanë.” /Përshtati Pamfleti/
Lini një Përgjigje