FLASH
Shkruar nga Pamfleti
Kryeministri i Izraelit, Benjamin Netanyahu, deklaroi sot se Irani “nuk është më i njëjti” pas gati dy javësh sulmesh të përbashkëta nga Izraeli dhe Shtetet e Bashkuara, duke shtuar se operacionet kanë goditur forcat elitare të Teheranit.
Deklarata u bë gjatë konferencës së tij të parë për shtyp që nga fillimi i konfliktit, raportojnë Reuters dhe The Jerusalem Post.
Netanyahu tha se mban kontakte të shpeshta me presidentin amerikan Donald Trump, me të cilin, sipas tij, flet pothuajse çdo ditë.
“Ne flasim hapur,” u shpreh kryeministri izraelit.
Ai shtoi se një nga objektivat kryesore të operacioneve është të pengohet Irani që të zhvendosë programet e tij bërthamore dhe balistike në struktura nëntokësore.
Duke iu referuar frontit verior të konfliktit, Netanyahu paralajmëroi gjithashtu Hezbollahun, duke thënë se grupi “do të paguajë një çmim të lartë për agresionin e tij”.
I pyetur për udhëheqësin suprem të Iranit Mojtaba Khamenei dhe për liderin e Hezbollahut Naim Qassem, Netanyahu tha: “Unë nuk do të merrja asnjë sigurim jete për këta udhëheqës”.
Kryeministri nuk konfirmoi nëse Izraeli po armatos protestuesit iranianë, por shtoi se Izraeli mund të krijojë kushte që mund të çojnë në ndryshim të regjimit.
“Ne mund të krijojmë kushte për ndryshimin e regjimit, por i takon popullit të Iranit të dalë në rrugë,” tha ai.
Lini një Përgjigje