FLASH
Shkruar nga Pamfleti
Ministri i Jashtëm grek Nikos Dendias është takuar ditën e sotme pas mbledhjes së Këshillit të Punëve të Jashtëm të BE-së, me homologen shqiptare Olta Xhaçka.
Lajmi u bë publik nga vet kryediplomati grek, i cili shpërndau dhe një foto nga takimi “kokë më kokë” që pati me ministren Xhaçka në Bruksel.
Në reagimin e tij në Twitter, Dendias, theksoi se temë e diskutimit ishte dhe arrestimi i kryetarit të zgjedhur të Bashkisë së Himarës, Fredi Beleri.
“Në margjinat e takimit të sotëm të Këshillit të Punëve të Jashtëm të BE-së, u takova me homologen e Shqipërisë Olta Xhaçka. Gjatë diskutimit u ngrit edhe çështja që ka të bëjë me kryetarin e zgjedhur të Bashkisë Himare, Fredi Beleri”, tha Dendias.
Ndërkohë Fredi Bejleri është transferuar ditën e djeshme nga paraburgimi i Vlorës për në paraburgimin 313 në Tiranë.
Sot pritet të zhvillohet në GJKKO seanca e rivlerësimit të masës së sigurisë “Arrest me burg”, e dhënë nga gjykata e Vlorës një ditë përpara zgjedhjeve lokale. Ndërsa i arrestuari tjetër Pandeli Kokaveshi vazhdon të qëndrojë në spital pas problemeve me zemrën.
Gjyqtare e çështjes në seancën që do të mbahet në GJKKO, në orën 13:00, është Atalanta Zeqiri, ndërsa do të përfaqësojë organin e akuzës (SPAK), Dorina Bejko.
Beleri u arrestua gjatë orëve të para të mëngjesit të së premtes, 12 maj, dy ditë përpara zgjedhjeve, nën dyshimet si i përfshirë në shit-blerjen e votave.
Beleri ndodhej në ambientet e restorantit të tij në Himarë kur u shoqërua ne polici.
Ai u shoqërua nga efektivë të prokurorise Vlorë, në drejtim të komisariatit dhe më pas u transferua në komisariatin e Vlorës.
Bashkë me Belerin u shoqëruan dhe dy persona të tjerë, Pandeli Kokaveshi, pjesë e shtabit elektoral të Fredi Belerit dhe avokati i tij. Kokaveshi vuante nga problemet e zemrës, dhe disa orë pas shoqërimit të tij në polici është thirrur ambulanca që e ka marrë dhe e ka transferuar drejt spitalit pasi ka shfaqur probleme.
Pas tre orësh nga shoqërimi u lirua avokati personal i Fredi Belerit, i cili u shoqërua gjithashtu në prokurori.
Në fletën e arrestit të lëshuar ndaj Belerit theksohet se ai u ndalua në flagrancë duke blerë vota, ndërkohë që në dosjen e prokurorisë thuhet se blerja e votave është kryer nga Kokaveshi në ambientet e tualetit të një lokali në mesditë dhe jo në momentin e arrestimit.
Lini një Përgjigje