FLASH
Shkruar nga Pamfleti
Manfred Weber dhe Iratxe Garcia përpiqen të riparojnë marrëdhëniet për të shmangur një mocion mosbesimi ndaj Ursula von der Leyen…
Drejtuesit e dy partive më të mëdha politike në Evropë po organizojnë darka luksoze, ndërsa përpiqen të riparojnë marrëdhëniet e tyre të dëmtuara.
Manfred Weber i Partisë Popullore Evropiane (PPE) dhe Iratxe García e Socialdemokratëve dhe Demokratëve (S&D), së bashku me nga 10 deputetë nga secili grup, ishin në një darkë në Strasburg muajin e kaluar, sipas pesë personave që morën pjesë në takim. Takime të tjera të ngjashme pritet të zhvillohen edhe në të ardhmen.
Ideja është të ndalen përplasjet mes dy aleatëve tradicionalë pas një viti të trazuar, gjatë të cilit ata janë përballur për çështje të ndryshme, nga politika e migracionit e Bashkimit Evropian deri te agjenda e thjeshtimit rregullator e Komisionit Evropian.
Darka e parë u zhvillua më 10 shkurt në hotelin me 4 yje Leonor në qendër të Strasburgut, ku një menu me tre pjata mund të kushtojë rreth 85 euro për person, pa përfshirë verën. Faturën e pagoi PPE. Darka e radhës pritet të organizohet në prill.
Christophe Clergeau, nënkryetar i S&D dhe pjesëmarrës në darkë, i tha Politico se takimi kishte dy qëllime kryesore: nënkryetarët e grupeve të njiheshin më mirë me njëri-tjetrin dhe të diskutonin hapur pakënaqësitë.
“Ishte e nevojshme të kishim një diskutim të sinqertë dhe të drejtpërdrejtë në mënyrë diplomatike,” tha Clergeau, duke shtuar “ka probleme, loja që PPE bën me të djathtën ekstreme, agjenda e deregulimit të Komisionit, si dhe iniciativat e shumta që dobësojnë Marrëveshjen e Gjelbër dhe legjislacionin social dhe mjedisor.”
Darka “ishte e këndshme, shumë miqësore dhe ramë dakord të dërgojmë mesazhin se jemi një koalicion dhe se na pëlqen njëri-tjetri,” tha nënkryetarja kroate e PPE, Zeljana Zovko, një tjetër pjesëmarrëse, e cila me humor tha se dy grupet “po flirtojnë”.
PPE dhe S&D kanë bashkëpunuar për dekada, duke votuar shpesh së bashku dhe duke ndarë mes tyre postet kryesore në Bashkimin Evropian. Por kjo aleancë ka filluar të çahet, pasi zgjedhjet evropiane të vitit 2024 e zhvendosën Parlamentin më shumë drejt së djathtës. PPE tani po kalon disa ligje duke votuar bashkë me grupin e ekstremit të djathtë Patriotët, ku bëjnë pjesë Viktor Orban i Hungarisë dhe Marine Le Pen e Francës.
Ekziston gjithashtu edhe një armiqësi personale mes Weber dhe Garcia. Ajo lidhet me momentin kur drejtuesja e S&D (së bashku me liberalët) i tha Weber se nuk do të mbështeste kandidaturën e tij për president të Komisionit Evropian, post që më pas iu dha Ursula von der Leyen. Manon Aubry, bashkëkryetare e grupit të së Majtës në Parlament, i tha Politico se dy politikanët janë si “dy ish-partnerë toksikë”.
Qëllimi i darkës ishte të trajtonte pikërisht këto probleme.
“Shkëmbimi ishte produktiv,” tha nënkryetari i S&D, Alex Agius Saliba, i cili gjithashtu mori pjesë në takim. “Ne kemi theksuar gjithmonë se gjatë këtij mandati parlamentar aleanca pro-evropiane duhet të bëjë gjithçka për të mbetur efektive. Besojmë se koordinimi është thelbësor dhe jemi të përkushtuar të vazhdojmë në këtë rrugë.”
“Synojmë të shohim se si mund të përmirësojmë marrëdhëniet dhe të bëjmë më shumë gjëra së bashku,” tha nënkryetari i PPE, Siegfried Mureșan, i cili ishte gjithashtu në darkë. Në vijim ai shtoi “nuk po vendosim objektiva jorealistë; ka një gatishmëri të përgjithshme për të kuptuar njëri-tjetrin dhe për të bashkëpunuar.”
Një tjetër eurodeputet që mori pjesë në takim, dhe kërkoi të mbetet anonim, e përshkroi darkën si një lloj “terapie grupi”, duke thënë se diskutimi u zhvillua si një lojë “ping-pongu”, ku anëtarët e PPE dhe S&D shprehën pakënaqësitë e tyre, por në mënyrë miqësore. “Ishin njerëz që donin vërtet të provonin ta rregullonin situatën.”
“Aksidente politike”
Në muajt e fundit, PPE ka votuar disa ligje për forcimin e politikës së migracionit dhe për reduktimin e disa rregullave mjedisore së bashku me grupet e djathta dhe të ekstremit të djathtë në Parlament.
Në një kohë kur shumica e qeverive në Evropë po lëvizin gjithashtu drejt së djathtës, Socialdemokratët janë përjashtuar gjithnjë e më shumë nga ndikimi në agjendën politike të BE-së. Kjo i ka shtyrë ata të ashpërsojnë retorikën ndaj Weber dhe von der Leyen.
Garcia e ka akuzuar presidenten e Komisionit se po “përvetëson agjendën e Trump” dhe se po tregon “zjarr deregulimi”.
“Ekziston gjithashtu ndjenja mes disa eurodeputetëve se nëse nuk kalojmë më shumë kohë duke shkëmbyer dhe punuar së bashku, ekziston rreziku i një aksidenti politik në muajt e ardhshëm, sepse mes nesh mungon besimi,” tha Clergeau.
Sipas tij, një “aksident” i tillë mund të jetë një bojkot nga Socialdemokratët i dosjeve kyçe, si buxheti afatgjatë i BE-së, ose mbështetja e S&D për një mocion mosbesimi ndaj Komisionit von der Leyen.
Presidentja e Komisionit i ka mbijetuar të katër mocioneve të mosbesimit të paraqitura gjatë këtij mandati. Megjithatë, disa eurodeputetë thonë se argumentet për largimin e saj vazhdojnë të ekzistojnë.
Ajo “praktikisht po lutet për një votë mosbesimi”, tha të hënën eurodeputeti spanjoll Jonás Fernández nga S&D. Ai iu referua një fjalimi të von der Leyen, ku ajo tha: “Evropa nuk mund të jetë më kujdestare e rendit të vjetër botëror, të një bote që ka kaluar dhe nuk do të kthehet.”
Ligjvënës të lartë të S&D kanë paralajmëruar se pakënaqësia po rritet brenda grupit, gjë që mund ta bëjë të vështirë për drejtuesit të kontrollojnë votën e eurodeputetëve. Kjo ndodhi edhe vitin e kaluar kur García dhe PPE arritën një kompromis për të ulur rregullat e gjelbra për bizneset, por shumë eurodeputetë socialdemokratë votuan kundër.
Me shpresë për përmirësim
Drejtuesit e PPE dhe S&D e dinë se marrëdhënia mes tyre ndoshta nuk do të jetë më kurrë si më parë. Ligjvënësit e PPE ndihen tashmë komodë duke votuar për ligje dhe duke vendosur agjendën e Parlamentit së bashku me shumicën e djathtë.
Weber i tha Politico se “askush nuk do ta ndalë” në zbatimin e programit të PPE dhe argumentoi se kur grupi ka votuar së bashku me të djathtën ekstreme, kjo nuk ka ndodhur për qëndrime radikale, por për pozicione që reflektojnë pikëpamjet e qeverive kombëtare dhe të Komisionit Evropian.
Të hënën, PPE votoi sërish me bllokun e djathtë për një projektligj që lejon vendet të krijojnë qendra deportimi në vende jashtë BE-së, pasi negociatat brenda koalicionit qendror dështuan.
Ndërkohë, S&D po përpiqet gradualisht të përshtatet me realitetin e ri politik. Në një takim të brendshëm më 3 mars, drejtuesit e grupit diskutuan mënyra për të përmirësuar koordinimin e brendshëm dhe për të shmangur rebelimet e eurodeputetëve kundër vijës së grupit.
Qëllimi është të forcohen angazhimi personal, gjykimi politik kolektiv, besimi i brendshëm dhe koordinimi, si dhe aftësia e përbashkët për të vepruar në mënyrë efektive si grup.
Pas këtij takimi, zëdhënësja e García, Andrea Maceiras, i tha Politico se testi i parë politik i afërt për grupin do të jetë raporti i ndërmjetëm për buxhetin afatgjatë të BE-së (MFF).
Socialdemokratët synojnë të ushtrojnë presion mbi PPE në dosje ku blloku i djathtë nuk ka konsensus, siç është buxheti shumëvjeçar i BE-së, për të arritur fitore politike.
Megjithëse besimi mes dy grupeve duhet ende të riparohet, darka e parë u konsiderua nga të dyja palët si një sukses, aq sa po planifikohet edhe një tjetër.
Këtë herë pritet që Socialdemokratët të zgjedhin vendin dhe të paguajnë faturën.
“Këtë herë Socialdemokratët duhet të na presin ata, dhe gjithçka varet nga humori dhe mundësitë financiare,” tha Zovko. /Përshtati Pamfleti/
Lini një Përgjigje