FLASH
Shkruar nga Pamfleti
Presidenti i SHBA-së, Donald Trump, thotë se ka urdhëruar Departamentin e Drejtësisë të publikojë dokumente shtesë në lidhje me abuzuesin seksual Jeffrey Epstein.
“Bazuar në sasinë qesharake të publikimeve lidhur me Jeffrey Epstein, i kam kërkuar Prokurores së Përgjithshme Pam Bondi të paraqesë çdo dëshmi përkatëse të Jurisë së Madhe, në varësi të miratimit të Gjykatës”, tha Trump në një postim në rrjetet sociale.
Është e paqartë nëse Trump po autorizon publikimin e këtyre dokumenteve apo kur mund të ndodhë kjo, megjithëse një veprim i tillë zakonisht do të kërkonte miratimin e një gjykate.
Zhvillimi vjen pas presioneve të vazhdueshëm nga disa prej mbështetësve më besnikë të Trump, të cilët kërkojnë zbardhje të mëtejshme në rastin Epstein.
Prokurorja e Përgjithshme Pam Bondi, disa minuta pas urdhërit të Presidentit Trump, tha se "jemi gati ta dërgojmë gjykatën nesër për të hapur transkriptet e jurisë së madhe."
Një juri e madhe është një grup qytetarësh i ngritur nga një prokuror për të përcaktuar nëse ka prova të mjaftueshme për të ngritur akuza. Në terma ligjorë, ajo përcakton nëse ekziston shkak i mundshëm për të besuar se është kryer një krim.
Vendimet e jurisë së madhe duhet të testohen para një jurie normale në gjykatë, në mënyrë që një i dyshuar të dënohet për një krim.
Nuk është e qartë nëse postimi i presidentit kishte të bënte me dëshminë e jurisë së madhe nga grupi i parë i çështjeve që kishin të bënin me Epstein në fillim të viteve 2000, apo nga akuzat federale të ngritura në vitin 2019.
Disa dokumente të jurisë së madhe janë publikuar tashmë në lidhje me rastin në Florida në vitin 2006.
Bondi javën e kaluar njoftoi se Departamenti i Drejtësisë i SHBA-së nuk besonte se Epstein kishte një të ashtuquajtur listë klientësh që mund të implikonte bashkëpunëtorë të profilit të lartë dhe se vrau veten, pavarësisht spekulimeve konspirative për vdekjen e tij.
Kjo ndodhi pasi Bondi kishte lajmëruar se ishte gati të njoftonte zbulime të mëdha rreth çështjes, duke përfshirë "shumë emra" dhe "shumë regjistra fluturimesh", një kujtim për ata që udhëtuan me financuesin ose që vizituan ishujt e tij privatë ku thuhet se kanë ndodhur shumë nga krimet e tij të supozuara.
Komentatori konservator Charlie Kirk, i cili ishte kritik ndaj trajtimit të dosjeve nga administrata ditët e fundit, vlerësoi veprimin e Trump.
"Kjo është diçka për të cilën kemi folur për një kohë të gjatë, dhe me të vërtetë një fuqi për bazën," tha ai.
Epstein vdiq në një qeli burgu në Nju Jork në vitin 2019, ndërsa priste gjyqin për akuzat për trafikim seksual. Vdekja e tij, ndërsa ishte në burg ndodhi më shumë se një dekadë pas dënimit të tij për nxitje prostitucioni nga një e mitur, për të cilën ai ishte regjistruar si shkelës seksual. /Përshtatur nga BBC/
Lini një Përgjigje