FLASH
Shkruar nga Pamfleti
SHBA akordon 150 milionë dollarë ndihmë, mobilizon forca ushtarake dhe lehtëson përkohësisht disa sanksione, ndërsa reagimi ndaj katastrofës shihet si një test i rëndësishëm për strategjinë amerikane në rajon…
Tërmeti në Venezuelë po vë në provë "Doktrinën Donro" të Donald Trumpit në Amerikën Latine. Shtetet e Bashkuara kanë pezulluar disa nga sanksionet ndaj vendit që ndodhet nën ndikimin e tyre, kanë ofruar ndihmë prej 150 milionë dollarësh dhe kanë mobilizuar anije e avionë ushtarakë pas katastrofës, shkruan El País.
Shtetet e Bashkuara, të cilat gjatë administratës Trump kanë reduktuar ndjeshëm ndihmën e tyre për vendet e huaja, kanë dislokuar forca për të ndihmuar Venezuelën pas dy tërmeteve të së martës. Administrata Trump, e cila e mban vendin e Karaibeve nën mbikëqyrjen e saj pas operacionit ushtarak që çoi në arrestimin e Nicolas Maduro më 3 janar, dhe që përmes të ashtuquajturës "Doktrina Donro", e shpall Amerikën Latine si sferën kryesore të ndikimit të SHBA-së, njoftoi të enjten një paketë ndihme prej rreth 150 milionë dollarësh, mobilizimin e forcave, përfshirë anije dhe avionë të Komandës Jugore të SHBA-së, përgjegjëse për operacionet ushtarake amerikane në rajon, si dhe lehtësimin e disa sanksioneve ndaj Venezuelës për t'i mundësuar kryerjen e transaksioneve që lidhen me përballimin e pasojave të katastrofës.
Një reagim i menjëhershëm dhe efektiv ndaj katastrofës në Venezuelë është i drejtë dhe i domosdoshëm nga pikëpamja humanitare, duke pasur parasysh përmasat e tragjedisë. Megjithatë, në sytë e Uashingtonit ai përbën edhe një përparësi absolute të politikës së jashtme. Duke qenë tashmë de facto një protektorat, vendi i Amerikës së Jugut konsiderohet kyç për strategjinë gjeopolitike të Shteteve të Bashkuara.
Trump e paraqet Karakasin si një histori suksesi të politikës së tij ndërhyrëse gjatë mandatit të dytë dhe e ka bërë atë gurin e themelit të "Doktrinës Donro", një version i përditësuar i Doktrinës Monroe të shekullit XIX, e cila hapi një epokë ndërhyrjesh amerikane në Amerikën Latine, të drejtuara kryesisht kundër qeverive të majta dhe mbështetësve të tyre. Versioni i Trumpit premton përfitime të mëdha për qeveritë dhe figurat aleate në rajon, ndërsa parashikon trajtim shumë më të ashpër, përfshirë ndërhyrjen ushtarake, ndaj kundërshtarëve.
Shprehjet e solidaritetit të SHBA-së ndaj Venezuelës erdhën menjëherë dhe në nivelet më të larta. Vetëm disa orë pas tërmetit të parë, presidenti Donald Trump premtoi ndihmë të bollshme dhe të menjëhershme.
"Do t'i ndihmojmë," përsëriti ai të enjten gjatë një pritjeje për fermerët në Shtëpinë e Bardhë.
Edhe sekretari amerikan i Shtetit, Marco Rubio, mori angazhime të ngjashme, duke deklaruar se përgjigjja e SHBA-së do të jetë "e madhe, e shpejtë dhe efektive". Menjëherë pas kësaj, Departamenti i Shtetit, Pentagoni dhe Departamenti i Thesarit shpallën një listë të gjerë masash dhe burimesh që do të vihen në dispozicion.
Në një deklaratë zyrtare, Departamenti i Shtetit paraqiti planin fillestar të reagimit ndaj katastrofës, e cila deri tani ka shkaktuar të paktën 236 viktima dhe më shumë se 4.300 të plagosur. Sipas Shërbimit Gjeologjik të Shteteve të Bashkuara (USGS), bilanci mund të rëndohet edhe me mijëra viktima të tjera.
Departamenti i Shtetit, i cili pas shpërbërjes së Agjencisë Amerikane për Zhvillim Ndërkombëtar (USAID) vitin e kaluar ka marrë përgjegjësinë për administrimin e ndihmës së jashtme amerikane, njoftoi se 100 milionë dollarë do t'i jepen Zyrës së Kombeve të Bashkuara për Koordinimin e Çështjeve Humanitare (OCHA) në Venezuelë, ndërsa 50 milionë dollarë të tjerë do të ndahen për organizatat humanitare që veprojnë në terren.
Ndër përfituesit janë World Vision, Samaritan's Purse, Catholic Relief Services, International Medical Corps, Programi Botëror i Ushqimit (WFP) dhe Organizata Ndërkombëtare për Migracionin (IOM).
Qeveria amerikane ka mobilizuar gjithashtu një Ekip të Reagimit ndaj Fatkeqësive (DART), si dhe dy ekipe shumë të specializuara të kërkim-shpëtimit nga Departamenti i Zjarrfikësve i Qarkut Fairfax në Virxhinia dhe Departamenti i Zjarrfikësve i Qarkut Los Angeles në Kaliforni.
Të dy ekipet përbëhen nga zjarrfikës, mjekë, inxhinierë dhe specialistë të kërkim-shpëtimit me qen të trajnuar. Ata kanë përvojë të fundit në vendet e Karaibeve, pasi vitin e kaluar u angazhuan në Xhamajkë pas uraganit "Melissa".
Departamenti i Shtetit ka theksuar se bashkëpunon ngushtë me Pentagonin për çështjet e logjistikës dhe transportit, duke qenë se aeroporti Maiquetía, pranë Karakasit, është mbyllur për shkak të dëmeve të shkaktuara nga tërmeti.
Komanda Jugore e SHBA-së, përgjegjëse për forcat amerikane në Amerikën Latine, deklaroi se forcat e saj "po veprojnë me shpejtësi për të vënë në dispozicion kapacitetet unike të ushtrisë amerikane në logjistikë, operacione shpëtimi dhe transport ajror, me qëllim shpëtimin e jetëve dhe mbështetjen e qeverisë së Venezuelës gjatë kësaj krize."
Sipas deklaratës, Komanda po bashkërendon gjithashtu veprimet "me partnerë dhe aleatë të tjerë në rajon, të cilët janë angazhuar t'i bashkohen përpjekjes ndërkombëtare të ndihmës për të mbështetur popullin e Venezuelës në këtë periudhë nevoje."
Komandanti i Komandës Jugore, gjenerali Francis Donovan, njoftoi dislokimin e një anijeje amfibe transporti, një anijeje luftarake, avionëve transportues, platformave të zbulimit dhe helikopterëve.
Ndërkohë, ndërsa organizatat për të drejtat e njeriut dhe disa qeveri, si ajo e presidentit në largim të Kolumbisë, Gustavo Petro, i kërkuan Uashingtonit të hiqte sanksionet ndaj Venezuelës për shkak të përmasave të katastrofës, Departamenti amerikan i Thesarit njoftoi pezullimin deri më 23 tetor të disa prej këtyre sanksioneve.
Ky pezullim i lejon Venezuelës të kryejë pagesa dhe transaksione të tjera financiare, me kusht që ato të lidhen drejtpërdrejt me operacionet e ndihmës pas katastrofës. Në të kundërt, theksoi Departamenti i Thesarit, qeveria e drejtuar nga Delcy Rodríguez nuk do të kishte qenë në gjendje t'i realizonte këto transaksione.
Departamenti sqaroi se licenca e përgjithshme që autorizon këto veprime nuk përfshin zhbllokimin e aseteve të ngrira nga sanksionet, si dhe nuk zbatohet për transaksione apo aktivitete të tjera që mbeten të ndaluara sipas masave ndëshkuese të vendosura nga Uashingtoni ndaj regjimit çavist.
Megjithëse Shtetet e Bashkuara, sipas artikullit, morën de facto kontrollin e vendit dhe vendosën Delcy Rodríguez, numrin dy në hierarkinë e Nicolás Maduro-s, në postin e presidentes, ato kanë lënë në fuqi shumicën e sanksioneve ekzistuese. Megjithatë, Uashingtoni ka lëshuar licenca për kërkimin dhe tregtimin e naftës, shtylla kryesore e ekonomisë venezueliane, sektor që administrata republikane e ka vendosur nën mbikëqyrjen amerikane.
Shpejtësia e reagimit dhe numri i madh i masave të shpallura nga Departamenti i Shtetit, Pentagoni dhe Departamenti i Thesarit dallojnë dukshëm nga reagimi amerikan ndaj katastrofave të tjera gjatë presidencës së Trumpit.
Kur Mianmari, një nga vendet më të varfra të Azisë Juglindore, ku rreth 20 milionë njerëz kishin nevojë për ndihmë humanitare edhe para katastrofës natyrore, u godit në mars të vitit të kaluar nga një tërmet me magnitudë 7,7, i ngjashëm me atë në Venezuelë dhe më i forti në rajon në dekada, Shtetet e Bashkuara premtuan vetëm 9 milionë dollarë ndihmë.
Vetëm disa ditë para atij tërmeti, administrata kishte shkarkuar zyrtarët që do të drejtonin operacionin humanitar.
Pak muaj më vonë, në nëntor të vitit 2025, reagimi ndaj kalimit të uraganit "Melissa" në Karaibe ishte më i fuqishëm. Uashingtoni dislokoi një operacion të Këmbësorisë Detare, një ekip koordinues DART dhe ekipe kërkim-shpëtimi, duke akorduar 37 milionë dollarë për vendet e prekura, rreth një të katërtën e shumës së shpallur tani për Venezuelën.
"Duke pasur parasysh bashkëpunimin e ngushtë të SHBA-së me Delcy Rodríguez dhe fokusin e administratës Trump në Hemisferën Perëndimore përmes të ashtuquajturës 'Doktrina Donro', shumëçka varet nga mënyra se si do të zhvillohet reagimi amerikan ndaj kësaj katastrofe", thotë Sam Wigersky, ish-koordinator i ekipeve të reagimit ndaj fatkeqësive në Agjencinë Amerikane për Zhvillim Ndërkombëtar (USAID) dhe aktualisht analist në Këshillin për Marrëdhëniet me Jashtë (Council on Foreign Relations).
Pas shfuqizimit të USAID-it, "bota po vëzhgon me kujdes nëse Departamenti i Shtetit ruan ende kapacitetin operacional që dikur e kishte USAID-i", shton ai.
Wigersky thekson se "përmasat e kësaj katastrofe janë të krahasueshme me tërmetin në jug të Haitit në vitin 2021 ose me tërmetet në Turqi dhe Siri në vitin 2023. Të dyja shkaktuan humbje masive jetësh njerëzore, dëme të jashtëzakonshme në infrastrukturë dhe pasoja të rënda ekonomike."
Në një rastësi të zymtë, premtimet për ndihmë të shpejtë dhe të konsiderueshme u bënë po atë ditë kur Gjykata Supreme e Shteteve të Bashkuara vendosi në favor të administratës Trump, duke i dhënë të drejtë qeverisë të revokojë Statusin e Përkohshëm të Mbrojtjes (TPS) dhe, rrjedhimisht, të deportojë shtetas sirianë dhe haitianë që mbroheshin nga ky status.
Programi TPS u jep leje të përkohshme qëndrimi dhe pune qytetarëve të vendeve të prekura rëndë nga konfliktet ose fatkeqësitë natyrore.
Ish-sekretarja e Sigurisë Kombëtare, Kristi Noem, e anuloi vitin e kaluar TPS-në për 13 vende, përfshirë Venezuelën, Afganistanin, Nikaraguan dhe Hondurasin. Si pasojë e vendimit të Gjykatës Supreme, edhe qytetarët e këtyre vendeve që deri tani përfitonin nga kjo mbrojtje mund të preken nga masat e dëbimit./Përshtati Pamfleti nga El Pais/.
Lini një Përgjigje