FLASH
Shkruar nga Pamfleti
Një britanike oficere e re policie ka gjetur vdekjen gjatë pushimeve në ishullin grek të Korfuzit, teksa ishte gjetur pa ndjenja në ditën e parë të mbërritjes në Kavos.
Raportohet se 22-vjeçarja Hannah Emily Byrne që kishte nisur punë me policinë e Surrey në jug të Londrës besohet se ka humbur ndjenjat nga një atak kardiak pas konsumit të alkoolit. Ajo u gjet e rrëzuar jashtë hotelit të saj ndërsa zyrtarët vendas po hetojnë nëse pija e saj ka qenë e kontaminuar.
Mjeku ligjor i Korfuzit, Yannis Aivatidis tha: “Kemi pikëpyetje mbi alkoolin që ka konsumuar. A ka qenë i kontaminuar ilegalisht? A ka qenë i intoksikuar me metanol? Duhet të presim testet e toksikologjisë”.
Ai shton më tej se testet kërkojnë dy javë kohë por do të zbulojnë nëse vdekja ishte apo jo një aksident.
Baret në resortet greke i janë nënshtruar një serie kontrollesh pas vdekjes së të resë të dielën, teksa raportohet se 28 janë mbyllur që prej ngjarjes, sipas DailyMail.
Megjithse ende nuk është zbuluar përfshije kriminale në ngjarje, nuk është e qartë nëse e ndjera ishte apo jo vetëm në kohën e vdekjes.
Aivatidis shton: “Ne besojmë se ajo mund të mos ishte e qartë për ndërtesën ku banonte dhe është rrëzuar teksa tentonte të hynte, nuk është ende e qartë se ku ishte ndarë me miqtë e saj”.
Policia e Surrey në Britani tha në një deklaratë: “Një oficere që shërbente me ne ka humbur jetën gjatë pushimeve në Korfuz. Ne po punojmë për të mbështetur familjen e saj dhe kolegët, gjatë kësaj kohe të vështirë. Hetimet mbi ngjarjen po kryhen nga autoritetet greke dhe ne presim informacione teksa ata vazhdojnë punën e tyre”.
Lini një Përgjigje