FLASH
Shkruar nga Pamfleti
Pas një prej netëve më të errëta për Kievin, ku raketat dhe dronët rusë goditën zemrën e kryeqytetit ukrainas duke shkaktuar të paktën 18 viktima, mes tyre katër fëmijë, Mbretëria e Bashkuar ka ndërmarrë një veprim të fortë diplomatik duke thirrur urgjentisht ambasadorin rus në Londër, Andrey Kelin, për të kërkuar llogari.
Ndërtesa e British Council dhe zyrat e Delegacionit të BE-së në Kiev pësuan dëme nga sulmet ajrore, ndërsa banesa civile u shkatërruan plotësisht në distriktin Darnytskyi. Autoritetet ukrainase raportojnë se shumë persona janë ende nën rrënoja.
Një zëdhënës i Foreign Commonwealth and Development Office (FCDO) deklaroi në emër të qeverisë britanike: “Mbretëria e Bashkuar dënon me forcë të madhe këto sulme skandaloze ndaj civilëve ukrainas dhe dëmtimin e objekteve diplomatike si British Council dhe Delegacioni i BE-së. Këto janë akte brutale që përbëjnë një eskalim të papërgjegjshëm të luftës nga ana e Rusisë, duke sabotuar përpjekjet për paqe ndërkombëtare. Ne i kemi bërë të qartë Rusisë se këto veprime vetëm do të forcojnë vendosmërinë tonë për të mbështetur Ukrainën. Rusia duhet të ndalojë menjëherë këtë vrasje dhe shkatërrim pa kuptim.”
Në një lëvizje të rrallë, ambasadori rus Andrey Kelin, gjatë mbërritjes së tij në Foreign Office, uli xhamin e makinës përballë kamerave – një gjest jo i zakonshëm për diplomatët – por nuk bëri asnjë koment. Një sinjal që, sipas analistëve, tregon tensionin dhe izolimin diplomatik të Rusisë.
Ministri i Jashtëm britanik, David Lammy, konfirmoi thirrjen e ambasadorit dhe e quajti sulmin një akt të tmerrshëm lufte:
“Putin po vret civilë të pafajshëm dhe po shkatërron qytete me qëllim. Britania nuk do të heshtë. Ne e kemi thirrur ambasadorin rus për të dhënë llogari. Ky tmerr duhet të ndalet.”
Ndërsa kryeministri Keir Starmer theksoi në një deklaratë të posaçme se Mbretëria e Bashkuar do të vazhdojë të mbështesë Ukrainën “pa kushte dhe pa hezitim”.
Sulmi, i ndodhur gjatë natës, përfshiu më shumë se 600 raketa dhe dronë, sipas burimeve ukrainase. Një ndërtesë banimi pesëkatëshe u godit rëndë në distriktin lindor të Darnytskyit, ku humbën jetën shumica e viktimave.
Deri tani janë konfirmuar 18 të vdekur, mes tyre 4 fëmijë, përfshirë një vajzë dyvjeçare. Autoritetet ukrainase njoftojnë se kërkim-shpëtimi vijon, pasi shumë persona mendohet se ndodhen ende nën rrënoja.
Ndërtesa të tjera pranë qendrës së qytetit, përfshirë misione diplomatike dhe institucione ndërkombëtare kulturore, pësuan dëme të konsiderueshme. Dëmtimi i British Council u cilësua si “i papranueshëm” nga diplomacia britanike dhe zgjoi reagim të fortë edhe në Bruksel.
Lini një Përgjigje