FLASH
Shkruar nga Pamfleti
Diplomacia mbetet prioritet, por marrëveshja me Teheranin është e vështirë. Uashingtoni mund të mbështesë sulme izraelite nëse bisedimet dështojnë…
Gjatë natës, nga dritaret e shtëpive në qytete të ndryshme të Iranit dëgjohen thirrje kundër udhëheqjes së vendit, përfshirë slogane si “Vdekje diktatorit” dhe “Poshtë Khamenei”.
Gjatë ditës, disa familje kanë zgjedhur të kthejnë ceremonitë mortore të të afërmve të tyre në forma proteste me këngë dhe valle.
Këto veprime përbëjnë një mesazh të hapur kundërshtimi ndaj regjimit.
Sipas traditës shiite, dita e 40-të pas vdekjes ka rëndësi të veçantë për përkujtimoret. Për disa nga viktimat e vrara gjatë protestave të fillimit të janarit, kjo periudhë ka përfunduar së fundmi. Në ceremoninë për Mohammad-Hossein Alikhani, 25 vjeç, i vrarë më 8 janar nga forcat e sigurisë, familjarët dhe të pranishmit nuk u kufizuan vetëm në lutje, por përfshinë muzikë dhe valle. Në përkujtimoren për Erfan Bozorgi, 22 vjeç, kampion i mundjes së krahut, i cili vdiq më 2 janar në spital pasi u plagos nga të shtënat, u përdorën elementë simbolikë të ceremonive tradicionale të dasmës persiane.
Protestat vazhdojnë në forma të ndryshme, ndërsa pjesëmarrësit shprehin bindjen se momenti mund të jetë vendimtar për ndryshim politik. Në shumë vende të botës, tubime solidariteti mbështetën protestuesit iranianë.
Sipas raportimeve, rreth 350 mijë persona morën pjesë në protesta në Los Anxhelos dhe Toronto, 250 mijë në Mynih, ndërsa në total mbi një milion njerëz u mblodhën nga Melburni në Londër, nga Parisi në Tokio.
Reza Pahlavi, djali i Shahut të rrëzuar, i ka kërkuar ish-presidentit amerikan Donald Trump një “ndërhyrje humanitare”.
Në prag të raundit të dytë të bisedimeve SHBA–Iran, që pritet të zhvillohet nesër në Gjenevë, sekretari amerikan i Shtetit Marco Rubio deklaroi se presidenti amerikan “preferon diplomacinë”, por theksoi se “askush nuk ka arritur të përmbyllë një marrëveshje të suksesshme me Iranin”.
Ai e cilësoi procesin “të ndërlikuar”, duke argumentuar se vendimmarrja në Teheran mbështetet në parime fetare.
Nga Afganistani, talebanët njoftuan se janë të gatshëm të mbështesin Iranin në rast të një sulmi amerikan.
Ndërkohë, autoritetet iraniane kanë sinjalizuar gatishmëri për kompromis në çështjen bërthamore, me kusht që SHBA të diskutojë heqjen e sanksioneve.
Kryeministri izraelit Benjamin Netanyahu ka përsëritur kushtet për një marrëveshje: largimin e uraniumit të pasuruar, çmontimin e infrastrukturës bërthamore, kufizimin e rrezes së raketave balistike në 300 kilometra dhe ndërprerjen e mbështetjes për grupet që Izraeli i konsideron terroriste. Sipas burimeve të CBS, Trump i ka thënë Netanyahut në një takim në fund të dhjetorit në Mar-a-Lago se është i gatshëm të mbështesë sulme izraelite ndaj Iranit nëse negociatat dështojnë.
Ndërkohë, në Iran vazhdojnë arrestimet. Që nga fillimi i protestave më 28 dhjetor, janë arrestuar mbi 53 mijë persona. Mes të dënuarve së fundmi me vdekje është Mohammadamin Biglari, 19 vjeç. Sipas të dhënave të organizatave të të drejtave të njeriut, numri i viktimave nga represioni arrin në mbi 36 mijë.
Organizata joqeveritare Hrana ka verifikuar me emra dhe prova rreth 7 mijë të vrarë, mes tyre të paktën 224 të mitur. /Përshtatur nga Il Giornale/
Lini një Përgjigje