FLASH
Shkruar nga Pamfleti
Ekzekutivi izraelit sfidon hapur autoritetin e Gjykatës Supreme, duke refuzuar zbatimin e një vendimi për organin rregullator të mediave. Opozita paralajmëron se vendi po hyn në një krizë kushtetuese.
Qeveria e Izraelit, e drejtuar nga Benjamin Netanyahu, ka njoftuar zyrtarisht se nuk do të zbatojë një vendim të Gjykatës së Lartë të Drejtësisë, duke shënuar për herë të parë në historinë e vendit një refuzim të hapur ndaj një vendimi të institucionit më të lartë gjyqësor.
Sipas mediave izraelite, vendimi lidhet me përbërjen e Këshillit të Autoritetit të Dytë për Televizionin dhe Radion, institucioni që mbikëqyr transmetuesit privatë në vend. Gazeta Haaretz e cilëson këtë hap si një veprim që mund ta çojë Izraelin në një krizë kushtetuese.
Muajin e kaluar, Gjykata e Lartë vendosi që Këshilli mund të vazhdonte punën edhe pas dorëheqjes së gjashtë anëtarëve të tij. Sipas gjykatës, dorëheqjet erdhën si rezultat i presioneve të ushtruara nga ministri i Komunikimeve, Shlomo Karhi, dhe bashkëpunëtorët e tij.
Gjykata vendosi gjithashtu që këto dorëheqje të mos llogariteshin për kuorumin minimal të nevojshëm për marrjen e vendimeve, duke argumentuar se ato ishin organizuar me qëllim bllokimin e funksionimit të institucionit.
Megjithatë, ministri i Komunikimeve, Shlomo Karhi, dhe ministri i Drejtësisë, Yariv Levin, firmosën deklaratën me të cilën qeveria refuzon vendimin e gjykatës.
"Nuk do të njohim asnjë vendim, emërim apo veprim të Këshillit të Autoritetit të Dytë derisa ai të përmbushë kërkesat minimale të përcaktuara qartë nga ligji", thuhet në dokumentin e qeverisë.
Dy ministrat argumentojnë se Gjykata e Lartë "nuk ka autoritet të shkelë ligjin" dhe se çdo vendim që bie në kundërshtim me legjislacionin nuk do të njihet.
Sipas ekzekutivit, vendimi i Gjykatës bie ndesh me ligjin e vitit 1990, i cili rregullon funksionimin e Autoritetit të Dytë për Televizionin dhe Radion.
Vendimi ka shkaktuar reagime të forta nga opozita.
Ish-kryeministri Naftali Bennett deklaroi se sfidimi i një vendimi të Gjykatës së Lartë "çon në anarki dhe në shpërbërjen e shtetit".
Edhe lideri i partisë Demokratët, Yair Golan, akuzoi qeverinë se po përgatit terrenin për të mos pranuar rezultatet e zgjedhjeve të ardhshme.
"Sot po provojnë të normalizojnë sfidimin e Gjykatës. Nesër mund të refuzojnë të pranojnë rezultatin e zgjedhjeve nëse humbasin", deklaroi ai.
Lideri i opozitës, Yair Lapid, tha se një qeveri që nuk zbaton vendimet e Gjykatës së Lartë "humb menjëherë legjitimitetin", ndërsa ish-kryeministri Ehud Barak e cilësoi zhvillimin si një "shpallje lufte ndaj shtetit demokratik të Izraelit", duke bërë thirrje për mosbindje civile.
Përplasja ka edhe pasoja konkrete për sektorin mediatik. Autoriteti i Dytë duhet të marrë vendime për statusin e kanalit konservator Channel 14, si dhe për blerjen e Channel 13 nga një grup investitorësh të udhëhequr nga sipërmarrësi Assaf Rappaport.
Sipas Times of Israel, organizatat që iu drejtuan gjykatës akuzojnë ministrin Karhi dhe qeverinë se janë përpjekur të ushtrojnë kontroll politik mbi institucionin për të penguar këtë transaksion.
Përplasja mes qeverisë së Netanyahut dhe sistemit gjyqësor vazhdon prej vitesh, por kjo është hera e parë që ekzekutivi deklaron hapur se nuk do të respektojë një vendim të Gjykatës Supreme, një zhvillim që po shton frikën për një krizë të thellë institucionale në Izrael.
Lini një Përgjigje