FLASH
Shkruar nga Pamfleti
Pas njoftimit për largimin nga posti i kryeministrit dhe drejtimi i Partisë Laburiste, gazetat kryesore britanike analizojnë arsyet dhe pasojat politike të vendimit të Keir Starmerit...
Kryeministri i Mbretërisë së Bashkuar, Keir Starmer, njoftoi dorëheqjen e tij nga posti i kryeministrit dhe nga drejtimi i Partisë Laburiste, pas dy vitesh në qeveri. “Në momentin kur hyra në Downing Street dy vjet më parë, ndjeva krenarinë më të madhe të jetës sime. Hyra në politikë për të pasur mundësinë të përmirësoj jetën e miliona njerëzve”, deklaroi Starmer.
Ai shtoi se partia e tij po shqyrtonte nëse ai ishte personi i duhur për ta udhëhequr në zgjedhjet e ardhshme të përgjithshme. “Dëgjova përgjigjen e partisë për këtë pyetje dhe e pranoj me kënaqësi. Çdo vendim që kam marrë ka pasur në qendër interesin e vendit që dua. Për këtë arsye do të jap dorëheqjen nga posti i liderit të Partisë Laburiste”, tha ai.
Por si u komentua nga mediat britanike dorëheqja e Starmer?
Independent: Një dorëheqje “prekëse”
Gazeta The Independent e përshkruan dorëheqjen e Starmerit si “prekëse”, duke e konsideruar një mundësi për ish-kryeministrin të shpjegojë pse duhej të kishte pasur më shumë kohë për të përfunduar projektin e tij politik.
Sipas gazetës, Starmer kujtoi arritjet e tij, nga reformimi i Partisë Laburiste dhe drejtimi i saj drejt një fitoreje të papritur zgjedhore, deri te stabilizimi i ekonomisë, rritja e shpenzimeve për mbrojtjen dhe masat kundër varfërisë së fëmijëve.
Megjithatë, The Independent thekson se ai nuk arriti të kapërcente humbjen e besimit brenda grupit parlamentar të partisë së tij, një realitet që, sipas gazetës, e pranoi me dinjitet.
Guardian: Nga triumfi në tragjedi
The Guardian vlerëson se karriera politike e Starmerit mori një zhvillim pothuajse “shekspirian”, duke e kthyer triumfin në tragjedi.
Gazeta shkruan se, brenda vetëm 11 vitesh nga hyrja e tij në Parlament, Starmer arriti të drejtojë Laburistët drejt një fitoreje historike, por gjatë dy viteve të fundit, sipas saj, humbi mbështetjen që e kishte sjellë në pushtet.
Sipas The Guardian, rënia e tij pasqyron një periudhë të pazakontë në politikën britanike, ku besnikëria tradicionale e votuesve është dobësuar dhe sistemi dypartiak po përballet me sfida të reja nga forca të ndryshme politike.
Gazeta shton se edhe aleatët më të afërt të Starmerit pranojnë se ai mban një pjesë të konsiderueshme të përgjegjësisë për zhvillimet që çuan në largimin e tij.
Observer: Si humbi mbështetjen
The Observer raporton se Starmer e kuptoi se koha e tij si kryeministër kishte përfunduar, pasi shumica e deputetëve laburistë po mbështesnin një alternativë të re udhëheqëse.
Sipas gazetës, ai arriti në përfundimin se pozicioni i tij nuk ishte më i qëndrueshëm pas konsultimeve me ministra, këshilltarë, drejtues sindikatash dhe donatorë të partisë.
Një zyrtar i lartë laburist i cituar nga The Observer tha se Starmer duket se ishte pajtuar me dorëheqjen, duke u përballur me faktin se nuk gëzonte më mbështetjen e nevojshme politike.
Express: “Nekrologjia politike” e Starmerit
Daily Express e përshkruan Starmerin si një kryeministër që “zemëroi pensionistët, sipërmarrësit dhe fermerët”.
Sipas gazetës, ai arriti një nga fitoret më të mëdha zgjedhore të Partisë Laburiste, por më pas e çoi partinë drejt një humbjeje që shkaktoi shqetësim mes deputetëve për të ardhmen politike të vendit.
Express kujton se Starmer, me profesion jurist dhe ish-prokuror i lartë, u pa nga krahët moderatë të Laburistëve si figura që mund të rikthente besueshmërinë e partisë pas periudhës së Jeremy Corbyn.
Gazeta vlerëson se ai arriti ta rikthente Partinë Laburiste në pushtet me një shumicë të gjerë parlamentare, duke përfituar edhe nga dobësimi i Partisë Konservatore pas krizave politike dhe ekonomike të viteve të fundit. /Përshtati Pamfleti/
Lini një Përgjigje