FLASH
Shkruar nga Pamfleti
Presidenti amerikan Donald Trump, gjatë një fjalimi të mbajtur përpara qindra liderëve ushtarakë amerikanë në bazën ushtarake të Quantico-s, përsëriti pretendimet e tij të njohura për ndikimin personal në zgjidhjen e konflikteve ndërkombëtare.
Ai deklaroi: “Kam zgjidhur kaq shumë luftëra që kur jemi këtu. Jemi këtu gati nëntë muaj.” Duke iu referuar përpjekjeve për të bashkuar në tryezën e bisedimeve Presidentin e Ukrainës Volodymyr Zelensky dhe atë të Rusisë Vladimir Putin, Trump tha se “e vetmja mënyrë për ta bërë këtë është përmes forcës”, duke nënvizuar se “po të ishim të dobët, as nuk do ta merrnin telefonatën time.”
Gjatë fjalimit, Trump theksoi përkushtimin e tij të plotë ndaj ushtrisë: “Jam me ju, ju mbështes dhe si President, do t’ju qëndroj gjithmonë pranë 100%. Nuk do të më shihni kurrë të lëkundem.” Këto deklarata vijnë në kontrast me tonin më të ashpër të Sekretarit të Mbrojtjes, Pete Hegseth, i cili disa minuta më parë kishte kërkuar dorëheqjen e çdo ushtaraku që ndihej i zhgënjyer nga eliminimi i politikave të diversitetit në Pentagon.
Trump përsëriti se, pavarësisht sukseseve të tij në ndërmjetësimin e konflikteve ndërkombëtare, nuk pret të nderohet me Çmimin Nobel për Paqen. “A do ta marr Çmimin Nobel? Absolutisht jo. Do t’ia japin ndonjë që s’ka bërë asgjë. Apo ndonjë që ka shkruar një libër për trurin e Donald Trump dhe se si u zgjidhën luftërat – dhe ai do ta marrë Nobelin,” ironizoi ai para oficerëve të lartë.
Duke përmendur konfliktet mes Armenisë dhe Azerbajxhanit, Kamboxhias dhe Tajlandës, Indisë dhe Pakistanit, si dhe Serbisë dhe Kosovës, Trump i renditi si shembuj të ndikimit të tij në uljen e tensioneve globale. Megjithatë, disa liderë të huaj, përfshirë ata të Indisë, kanë mohuar që presioni amerikan të ketë qenë vendimtar, ndërsa të tjerë si Kamboxhia e kanë konsideruar ndihmën e SHBA-së si të vlefshme. Ndërkohë, konflikte të mëdha si ai mes Rusisë dhe Ukrainës mbeten ende të pazgjidhura.
Trump gjithashtu mbështeti linjën e re të ushtrisë amerikane që përjashton “kulturën politike korrekte”, duke theksuar se gjithçka do të bazohet në meritokraci. “Gjithçka është meritë. Ju të gjithë jeni këtu për shkak të meritës. Nuk do të zëvendësoheni për arsye politike, sepse dikush është politikisht korrekt dhe ju jo,” u shpreh ai. “Ne do të marrim njerëzit që bëjnë punën më të mirë. Kështu është ndërtuar ky vend. Ne jemi ndërtuar mbi meritën”, vijoi ai.
Duke përmbyllur, Trump shtoi se fokusi i ri i ushtrisë amerikane do të jetë mbi aftësinë fizike, karakterin dhe forcën: “Qëllimi i ushtrisë amerikane nuk është të mbrojë ndjenjat e askujt. Është të mbrojë republikën tonë.”
Lini një Përgjigje