FLASH
Shkruar nga Pamfleti
Kryeministri i Hungarisë, Viktor Orban, ka kritikuar ashpër planet e Bashkimit Evropian për përshpejtimin e procesit të anëtarësimit të Ukrainës, duke i cilësuar ato si një veprim armiqësor ndaj Budapestit.
Në një reagim të publikuar në rrjetet sociale, Orban deklaroi se Brukseli ka vendosur që Ukraina të bëhet anëtare e BE-së deri në vitin 2027 dhe e përshkroi këtë nismë si “një deklaratë të hapur lufte kundër Hungarisë”.
“Ata kanë vendosur që Ukraina do t’i bashkohet Bashkimit Evropian që në vitin 2027. Ky plan i ri është një deklaratë e hapur lufte kundër Hungarisë", shkroi Orban.
Sipas tij, institucionet evropiane dhe autoritetet ukrainase po anashkalojnë vullnetin e qytetarëve hungarezë dhe po ushtrojnë presion politik mbi Budapestin. Orban akuzoi gjithashtu se mbështetësit e integrimit të përshpejtuar të Ukrainës synojnë dobësimin e qeverisë së tij dhe ndryshimin e balancave politike të brendshme në Hungari.
Hungaria ka mbajtur një qëndrim më të rezervuar ndaj mbështetjes ushtarake për Ukrainën dhe ka kundërshtuar disa paketa ndihme dhe sanksionesh ndaj Rusisë, duke përdorur në disa raste të drejtën e vetos në kuadër të BE-së. Budapesti ka kërkuar që zgjerimi i Unionit të bazohet në kritere të qarta dhe të njëjta për të gjitha vendet kandidate.
Komisioni Evropian ka rekomanduar hapjen e negociatave me Kievin, ndërsa vendimi përfundimtar kërkon miratimin unanim të të gjitha shteteve anëtare. Debati mbi zgjerimin pritet të mbetet një nga çështjet kyçe në agjendën evropiane gjatë viteve të ardhshme.
Lini një Përgjigje