FLASH
Shkruar nga Pamfleti
Presidenti i Hungarisë, Tamás Sulyok, ka pranuar të largohet nga detyra pasi nënshkroi një amendament kushtetues të miratuar nga shumica parlamentare e partisë Tisza, e drejtuar nga kryeministri Péter Magyar.
Amendamenti i jep fund menjëherë mandatit të Sulyokut, me argumentin se ai ka humbur "besimin e shoqërisë". Presidenti ishte zgjedhur në fillim të vitit 2024 nga deputetët e partisë nacionaliste Fidesz, e ish-kryeministrit Viktor Orbán.
Sulyok deklaroi se ishte i detyruar ta nënshkruante ligjin, pasi respekton Kushtetutën dhe procedurat ligjore. Megjithatë, ai paralajmëroi se ndryshimet dëmtojnë shtetin e së drejtës në Hungari.
"Amendamenti i shtatëmbëdhjetë i Kushtetutës shënon një pikë kthese për demokracinë kushtetuese të Hungarisë. Largimi i zyrtarëve publikë në një mënyrë që cenon hapur shtetin e së drejtës krijon një precedent negativ dhe dëmton vlerat demokratike, ndarjen e pushteteve dhe rendin kushtetues", u shpreh ai.
Ndryshimet janë pjesë e përpjekjeve të kryeministrit Péter Magyar për të çmontuar strukturat e ndikimit të ngritura nga Viktor Orbán, pasi partia Tisza fitoi me shumicë zgjedhjet parlamentare të prillit.
Orbán reagoi ashpër ndaj reformës, duke shkruar në Facebook se "tirania nuk është më një kërcënim, por një realitet". Sipas tij, "nëse kjo mund t'i ndodhë presidentit, nesër askush nuk do të jetë i sigurt".
Pas humbjes në zgjedhje, partia Fidesz është përballur me dorëheqje të figurave të njohura dhe rënie të mbështetjes publike.
Parlamenti, ku partia Tisza gëzon shumicën prej dy të tretash që i mundëson ndryshimin e Kushtetutës, do të zgjedhë një president të ri, i cili do të qëndrojë në detyrë deri në hyrjen në fuqi të Kushtetutës së re ose për një mandat maksimal pesëvjeçar.
Kryeministri Magyar njoftoi se, deri në zgjedhjen e presidentit të ri, detyrën e kreut të shtetit do ta ushtrojë përkohësisht kryetarja e Parlamentit, Ágnes Forsthoffer.
Amendamenti kushtetues parashikon gjithashtu një kufi prej 12 vitesh për mandatet e deputetëve dhe vendos moshën e pensionimit 70 vjeç për gjyqtarët e Gjykatës Kushtetuese, çka do të detyrojë edhe presidentin aktual të kësaj gjykate, Péter Polt, një aleat i Orbánit, të largohet nga posti.
Magyar kishte kërkuar prej kohësh dorëheqjen e Sulyokut, duke e akuzuar se nuk përfaqësonte unitetin kombëtar dhe se vepronte në interes të Viktor Orbánit dhe qeverisë së tij.
Lini një Përgjigje