Bota28 Prill 2023, 07:40

SHBA me "dorë të hekurt", vendos sanksione ndaj Iranit dhe Rusisë

Shkruar nga Pamfleti

SHBA me "dorë të hekurt", vendos sanksione ndaj Iranit dhe

Shtetet e Bashkuara të Amerikës kanë vendosur  sanksione të reja ndaj agjencisë ruse të inteligjencës, FSB, dhe Gardës Revolucionare të Iranit ditën e djeshme.

Sanksionet e reja u nxitën nga “marrja në peng” e amerikanëve, si gazetarin e Wall Street Journal, Evan Gershkovich, të arrestuar në Rusi muajin e kaluar. SHBA-ja “po tregon se askush nuk mund të përfshihet në këtë lloj sjelljeje të tmerrshme të përdorimit të qenieve njerëzore si pengje, si pazare, pa pasur pasoja”, tha një zyrtar i lartë amerikan.

Të dyja agjencitë veçse kanë qenë të sanksionuara më parë nga Departamentet amerikane të Shtetit dhe të Thesarit. Por, zyrtari amerikan, siç raporton agjencia e lajmeve AFP, tha se sanksionet e reja do ta theksonin pikëpamjen e SHBA-së për atë që ai e përshkroi si një fenomen në rritje të qeverive që ndalojnë shtetas të huaj për të nxjerrë përfitime politike.

“Përdorimi i qenieve njerëzore si pengje politike, si pazare, të ndaluar nga qeveritë, por me pretendime të rreme, është një praktikë që duket se po shkon në drejtimin e gabuar” tha zyrtari amerikan.

Zbatimi i sanksioneve synon “ta promovojë llogaridhënien për fajtorët dhe, duke e bërë këtë, të parandalojë dhe të pengojë rastet e tilla në të ardhmen”, tha zyrtari.

Sanksionet vijnë një muaj pasi Rusia arrestoi gazetarin e Wall Street Journal, Evan Gershkovich, duke e akuzuar atë për spiunazh.

SHBA-ja po e kërkon lirimin e tij dhe të Paul Whelan, një ish-marins amerikan i arrestuar në Rusi në vitin 2018 dhe i dënuar me dy vjet burg lidhur me akuzat për spiunazh.

Vitin e kaluar, gjatë një shkëmbimi të të burgosurve, SHBA-ja siguroi lirimin nga Rusia të basketbollistes Brittney Griner, e burgosur për akuzat për drogë dhe një tjetër ish-marins, Trevor Reed, i burgosur për sulmin ndaj një oficeri policie rus.Të paktën tre shtetas amerikanë mbahen në burgje iraniane, përfshirë biznesmenin Siamak Namazi, i cili po mbahet në burgun Evin të Teheranit që nga viti 2015.

Thesari i SHBA-së vendosi gjithashtu sanksione ndaj katër zyrtarëve të lartë të organit të inteligjencës IRGC.

“Aksioni i sotëm synon zyrtarët e lartë dhe shërbimet e sigurisë në Iran dhe Rusi, të cilët janë përgjegjës për pengmarrjen ose ndalimin e gabuar të shtetasve amerikanë jashtë vendit”, tha në një deklaratë nënsekretari i Thesarit, Brian Nelson.

shba irani rusia sanksione