FLASH
Shkruar nga Pamfleti
SHBA intensifikon sulmet ndaj Iranit, goditen aeroporti i Iranshahr-it, një urë strategjike dhe infrastruktura e komunikimit
Shtetet e Bashkuara kanë zgjeruar operacionet ushtarake kundër Iranit, duke ndërmarrë një valë të re sulmesh ndaj objektivave strategjikë në jug të vendit. Mediat iraniane raportojnë se avionë luftarakë amerikanë kanë goditur aeroportin e Iranshahr-it, një urë të rëndësishme në rajonin e Bandar-e Khamir dhe një kullë telekomunikacioni në Bandar Abbas.
Sipas agjencisë iraniane Tasnim, avionët amerikanë lëshuan raketa ndaj aeroportit të Iranshahr-it, ndërsa Uashingtoni kishte njoftuar më herët nisjen e valës së gjashtë të sulmeve kundër Iranit.
Ndërkohë, agjencia Fars raportoi se një urë në rajonin e Bandar-e Khamir u godit rreth orës 23:00 me orën lokale. Sipas medias iraniane, ura përbën një lidhje të rëndësishme rrugore mes Bandar Abbas dhe Lar, çka e bën atë një objektiv me rëndësi strategjike për lëvizjen e njerëzve dhe furnizimeve.
Një tjetër sulm, sipas Tasnim, goditi një kullë komunikimi në një kodër pranë qytetit portual të Bandar Abbas, duke shkaktuar ndërprerje të energjisë elektrike në zonë. Agjencia shton se të paktën shtatë persona kanë mbetur të plagosur nga sulmi amerikan.
Sulmet e fundit tregojnë zgjerimin e operacioneve amerikane ndaj infrastrukturës strategjike iraniane, ndërsa përplasja mes Uashingtonit dhe Teheranit vazhdon të përshkallëzohet, duke rritur frikën për një konflikt edhe më të gjerë në rajon.
Lini një Përgjigje