FLASH
Shkruar nga Pamfleti
Tregjet globale reagojnë pozitivisht ndaj raportimeve për një memorandum mirëkuptimi që mund të ulë tensionet në Ngushticën e Hormuzit dhe të hapë negociata të reja bërthamore...
Çmimet e naftës ranë ndjeshëm të mërkurën, me naftën Brent që humbi rreth 10% të vlerës, pasi raportimet për një marrëveshje të mundshme mes SHBA-së dhe Iranit rritën pritshmëritë për zbutje të tensioneve gjeopolitike. Çmimet referuese të kontratave të naftës dhe gazit pësuan rënie të fortë në Europë, pas raportimeve se SHBA-ja dhe Irani mund të jenë pranë një marrëveshjeje për t’i dhënë fund konfliktit dy-mujor.
Nafta Brent dhe ajo amerikane WTI ranë pas sinjaleve të reja diplomatike nga Uashingtoni dhe Teherani, duke shtuar shpresat për uljen e tensioneve rreth Ngushticës së Hormuzit pas javësh përshkallëzimi ushtarak. Sipas të dhënave të tregut, nafta Brent u tregtua me 97.62 dollarë për fuçi, rreth 9.5% më pak krahasuar me mbylljen e mëparshme. Megjithatë, çmimet e naftës mbeten shumë më të larta se niveli prej rreth 70 dollarësh për fuçi ku ndodheshin para fillimit të luftës SHBA-Izrael kundër Iranit, konflikt që ka goditur prodhimin dhe transportin e naftës në rajon.
Ndërkohë që çmimet e naftës kanë rënë, aksionet në tregjet globale janë rritur.
Indeksi FTSE 100 i kompanive më të mëdha britanike dhe indeksi gjerman DAX u rritën me mbi 2% në mes të ditës së tregtimit, ndërsa CAC 40 francez fitoi 3%. Edhe tregjet aziatike u mbyllën në rritje.
Sa i përket bursave, tregjet kryesore europiane mbeten më poshtë krahasuar me fundin e shkurtit, ndërsa indeksi amerikan S&P 500 është në rritje. Tregjet kryesore aziatike u rritën të gjitha të mërkurën. Indeksi Kospi i Koresë së Jugut u mbyll me rritje 6.45%, Hang Seng i Hong Kongut fitoi 1.22%, ndërsa Nikkei japonez u rrit me 0.38%.
Hang Seng mbetet në rënie që nga fillimi i luftës, ndërsa dy tregjet e tjera janë në territor pozitiv. Më 8 prill, SHBA-ja dhe Irani ranë dakord për një armëpushim, gjë që shkaktoi rënie të çmimeve të naftës dhe rritje të bursave.
Sipas një raporti të Axios, Shtëpia e Bardhë beson se është pranë arritjes së një marrëveshjeje me Iranin, bazuar në një memorandum mirëkuptimi njëfaqësh që synon përfundimin e konfliktit dhe krijimin e një kornize për negociata më të gjera bërthamore.
Duke cituar dy zyrtarë amerikanë dhe dy burime të tjera, Axios raportoi se Uashingtoni pret një përgjigje nga Teherani për çështjet kyçe brenda 48 orëve të ardhshme.
Sipas raportimeve, dokumenti do të shpallte fundin e luftës në rajon dhe do të hapte një periudhë 30-ditore negociatash për rihapjen e ngushticës, kufizimin e programit bërthamor iranian dhe heqjen e sanksioneve amerikane. Raportet sugjerojnë se kjo është pika më e afërt drejt një marrëveshjeje që nga fillimi i konfliktit.
Ndërkohë, ministri i Jashtëm iranian Abbas Araghchi deklaroi të mërkurën se Teherani mbetet i përkushtuar ndaj diplomacisë, duke ruajtur njëkohësisht gatishmërinë për t’iu përgjigjur çdo “akti keqdashës”.
Araghchi informoi gjithashtu ministrin e Jashtëm kinez Wang Yi, gjatë një takimi në Pekin, mbi përpjekjet e fundit diplomatike për t’i dhënë fund luftës SHBA-Izrael kundër Iranit, përfshirë bisedimet e ndërmjetësuara nga Pakistani mes Teheranit dhe Uashingtonit.
“Irani, ashtu siç veproi me vendosmëri në mbrojtje të vetes dhe mbetet plotësisht i përgatitur për t’u përballur me çdo agresion, është gjithashtu serioz dhe i palëkundur në fushën e diplomacisë”, tha Araghchi.
Këto zhvillime vijnë pasi presidenti amerikan Donald Trump njoftoi të martën se ushtria amerikane do të ndalojë përkohësisht operacionin “Project Freedom”, i cili synon sigurimin e transportit tregtar në Ngushticën e Hormuzit.
Trump deklaroi më pas në rrjetet sociale të martën se do ta pezullonte operacionin “për një periudhë të shkurtër për të parë nëse marrëveshja mund të finalizohet dhe nënshkruhet”.
Ai shtoi se “është bërë progres i madh drejt një marrëveshjeje të plotë dhe përfundimtare me përfaqësuesit e Iranit”. Trump tha gjithashtu se SHBA-ja do të vazhdojë të bllokojë anijet që lëvizin drejt ose nga portet iraniane, një masë që synon të ushtrojë presion mbi ekonominë iraniane.
Sekretari amerikan i Shtetit Marco Rubio deklaroi të martën para gazetarëve se ofensiva fillestare SHBA-Izrael ndaj Iranit kishte përfunduar, pasi objektivat e Uashingtonit ishin arritur.
“Ne preferojmë rrugën e paqes. Ajo që presidenti preferon është një marrëveshje”, tha Rubio.
Irani nuk iu përgjigj deklaratave të Rubios. Kryetari i Parlamentit iranian Mohammad Ghalibaf deklaroi më herët se ne e dimë shumë mirë se vazhdimi i situatës aktuale është i papranueshëm për Amerikën, ndërsa ne sapo kemi filluar. /Pamfleti/
Lini një Përgjigje