FLASH
Shkruar nga Pamfleti
Dy influencuesit u ndaluan nga autoritetet amerikane në bazë të një urdhër-arresti, ndërsa Mbretëria e Bashkuar kërkon ekstradimin e tyre për t'u përballur me akuza të rënda penale.
Vëllezërit Andrew dhe Tristan Tate, figura të njohura në rrjetet sociale me miliona ndjekës, janë arrestuar në Miami nga Shërbimi Amerikan i Marshalëve, në kuadër të një kërkese për ekstradim të paraqitur nga autoritetet britanike.
Sipas Prokurorisë së Kurorës në Britaninë e Madhe (CPS), dy vëllezërit përballen me dhjetëra akuza, mes tyre përdhunim, trafikim i qenieve njerëzore për shfrytëzim seksual, sulm fizik dhe vepra të tjera penale, që lidhen me ngjarje të dyshuara të ndodhura mes viteve 2010 dhe 2017. Autoritetet britanike kanë nisur procedurat për ekstradimin e tyre.
Andrew dhe Tristan Tate, të cilët kanë shtetësi britanike dhe amerikane, u bënë të njohur në mbarë botën për përmbajtjet e publikuara në rrjetet sociale, ku promovonin një stil jetese luksoz dhe pikëpamje kontroverse mbi marrëdhëniet gjinore.
Problemet e tyre me drejtësinë nuk janë të reja. Në vitin 2022, ata u arrestuan në Rumani nën dyshimin për krijimin e një grupi kriminal të organizuar, trafikim të qenieve njerëzore dhe përdhunim. Të dy i kanë mohuar vazhdimisht akuzat, ndërsa procedurat gjyqësore në Rumani janë zvarritur për shkak të çështjeve procedurale.
Andrew Tate, ish-kampion në kikboks, ka qenë prej vitesh në qendër të polemikave edhe për deklaratat e tij në rrjetet sociale. Në vitin 2016 ai u largua nga spektakli britanik "Big Brother" pas publikimit të një videoje që shkaktoi reagime të forta.
Avokati i vëllezërve Tate ka deklaruar se klientët e tij janë të pafajshëm dhe i ka cilësuar akuzat si të pabazuara, ndërsa pritet që gjykata në Florida të shqyrtojë procedurat që lidhen me kërkesën për ekstradim drejt Mbretërisë së Bashkuar.
Lini një Përgjigje