FLASH
Shkruar nga Pamfleti
Milani është shumë pranë zyrtarizimit të transferimit të Gonçalo Ramos nga PSG-ja. Sulmuesi portugez konsiderohet kërkesa kryesore e trajnerit Ruben Amorim për repartin ofensiv dhe marrëveshja mes dy klubeve raportohet se është arritur për rreth 55 milionë euro, plus 5 milionë euro në formë bonusesh.
Sipas raportimeve, futbollisti ka kryer edhe vizitat mjekësore, ndërsa zyrtarizimi pritet të vijë në ditët në vijim. Me këtë operacion, Ramos do të bëhet transferimi më i kushtueshëm në historinë e Milanit, duke kaluar rekordin e vendosur nga Rafael Leao, për të cilin klubi pagoi 49.5 milionë euro. Njëkohësisht, ky do të jetë edhe një nga transferimet më të shtrenjta të realizuara në Serinë A gjatë shtatë viteve të fundit.
Nga Benfika te PSG
I lindur më 24 qershor 2001 në Olhao të Portugalisë, Gonçalo Ramos e nisi karrierën te Olhanense përpara se, në vitin 2013, të transferohej në akademinë e Benfikës. Ai spikati shpejt në ekipet e moshave, ndërsa në sezonin 2019-2020 realizoi 20 gola në 40 ndeshje dhe u shpall golashënuesi më i mirë i UEFA Youth League.
Debutimi me ekipin e parë të Benfikës erdhi në vitin 2020, kur shënoi dy gola në ndeshjen kundër Desportivo das Aves. Pas largimit të Darvin Nunjez, Ramos u shndërrua në sulmuesin titullar të skuadrës dhe në vitin 2023 hyri në histori si lojtari më i ri që realizoi dy gola në Derbin e Lisbonës ndaj Sportingut.
Aventura me PSG
Në verën e vitit 2023 ai u transferua te PSG-ja, ku fitoi menjëherë kampionatin francez dhe Kupën e Francës. Pas një sezoni të dytë të vështirë, të ndikuar nga një dëmtim në kavilje që e mbajti jashtë fushave për rreth tre muaj, Ramos u rikthye në formë dhe kontribuoi në sukseset e skuadrës, duke fituar Ligën 1, Kupën e Francës dhe Ligën e Kampionëve.
View this post on Instagram
Në total, me fanellën e PSG-së, ai ka zhvilluar 131 ndeshje dhe ka shënuar 45 gola. Në sezonin e fundit regjistroi 12 gola dhe 2 asistime në 45 paraqitje.
Profili teknik
Ramos është një qendërsulmues modern, i aftë të kombinojë forcën fizike me cilësinë teknike. Fillimisht aktivizohej si mesfushor ofensiv, por me kalimin e viteve u afirmua si sulmues qendre. Ai shquhet për lojën në ajër, lëvizjet pa top dhe aftësinë për të bashkëpunuar me shokët e skuadrës.
Në skemën 3-4-2-1 të Ruben Amorim, portugezi pritet të jetë pika kryesore e sulmit, duke shërbyer si referencë në repartin ofensiv.
Jeta personale
Jashtë fushës, Gonçalo Ramos është partneri i Margarida Amaral Domingues, me të cilën ka një djalë, Bernardon, të lindur vitin e kaluar. Çifti kishte planifikuar martesën gjatë verës, por ceremonia u shty për shkak të angazhimeve të futbollistit me përfaqësuesen portugeze.
Ramos njihet edhe me dy nofkat "O Pistoleiro" dhe "Feliticeiro" ("Magjistari"), këtë të fundit të fituar falë aftësisë për t'u gjendur shpesh në vendin e duhur në momentin e duhur për të shënuar.
View this post on Instagram
Lini një Përgjigje