FLASH
Shkruar nga Pamfleti
Trajneri i Argjentinës, Lionel Scaloni, në konferencën për media ka konfirmuar se Lionel Messi nuk do ta nisë si titullar ndeshjen e fundit të fazës së grupeve ndaj Jordanisë, por ka lënë të hapur mundësinë që kapiteni të aktivizohet gjatë pjesës së dytë.
Argjentina e ka siguruar tashmë vendin e parë në Grupin J dhe kualifikimin për fazën me eliminim direkt, ndaj stafi teknik ka vendosur të pushojë shumicën e titullarëve për këtë përballje. Në konferencën për shtyp para ndeshjes, Scaloni deklaroi:
"Leo do të jetë në stol. Formacionin përfundimtar do ta vendos më vonë, por Leo do të futet në lojë më pas.", tha Scaloni.
Edhe pse Messi preferon të luajë çdo minutë të mundshme, trajneri argjentinas po tregohet i kujdesshëm, duke pasur parasysh se sfida ndaj Jordanisë nuk ka ndikim në renditjen e ekipit.
Gjithsesi, ylli i Argjentinës pritet të marrë minuta në pjesën e dytë, me qëllim që të ruajë ritmin e garës përpara ndeshjes së radhës në fazën me eliminim direkt, e cila do të zhvillohet javën e ardhshme.
Lini një Përgjigje