FLASH
Shkruar nga Francesco Cundari 
Përtej skandaleve seksuale dhe tmerrit të abuzimeve, kjo histori demaskon një “Skemë Ponzi” sociale që lidh emrat më të fuqishëm të globit. Nga politikanët e lartë te gjigantët e teknologjisë, rasti ngre pyetje rrëqethëse mbi moralin njerëzor kur ai çlirohet nga çdo shtrëngim ligjor, financiar apo social…
Ndërsa gazetarët dhe kureshtarët po depërtojnë mes miliona skedarëve që qeveria e Shteteve të Bashkuara vendosi të publikojë - pasi i përzgjodhi me shumë kujdes dhe i censuroi pjesërisht, duke treguar shumë më tepër vëmendje ndaj imazhit të Donald Trump sesa ndaj identitetit, fytyrave dhe madje të dhënave personale të viktimave - rasti i financierit Jeffrey Epstein po bëhet në të njëjtën kohë më i qartë dhe më i turbullt, duke u zbërthyer në degëzime, përrenj dhe rrjedha, ku secila është më shqetësuese se tjetra.
Në plan të parë është natyrisht tmerri, që ka të bëjë me shumë vajza, madje edhe të mitura, të përdorura nga Epstein për të kënaqur dëshirat e tij dhe ato të miqve të tij të shumtë e të shquar.
Që të gjithë ishin plotësisht të vetëdijshëm, pavarësisht se çfarë thonë tani, se kishin të bënin me një pedofil dhe grabitqar seksual të mirëfilltë, i identifikuar tashmë si i tillë nga drejtësia. E megjithatë ai ia doli, falë një marrëveshjeje skandaloze e të favorshme, të merrte një dënim qesharak.
Me shumë gjasa do të duhet kohë për të matur me saktësi thellësinë e kësaj humnere dhe përmasën e saktë të tmerreve të kryera ndaj atyre vajzave, në mos edhe fëmijëve, nga ana e Epstein dhe vizitorëve të tij të rregullt. Do të shohim se cilët dhe sa ishin ata (të gjithë tani natyrisht thonë se nuk dinin gjë, përfshirë edhe ata që në e-maile e këshillonin se si të pastronte imazhin).
Pastaj ekziston edhe çështja e intrigës ndërkombëtare të spiunazhit, që shkon nga Mossad-i (veçanërisht për raportet e ngushta të Epstein me ish-kryeministrin izraelit Ehud Barak) e deri te Rusia e Vladimir Putinit, e cila siç duket kishte më shumë agjentë në shtëpitë e financierit sesa në hotelin e famshëm “Lux” të Moskës në vitet 1930.
Lidhur me këtë, ekziston edhe çështja që prek politikën e brendshme të disa vendeve perëndimore, duke filluar nga Shtetet e Bashkuara, duke pasur parasysh marrëdhëniet shumë të ngushta të Trump dhe gjithë oborrit të tij me Epstein.
Mjafton të thuhet, sa për të huazuar një batutë nga Twitter, se filmi i famshëm dokumentar “Melania” i prodhuar nga Amazon, është faktikisht një dokumentar mbi një vajzë të Epstein, që u martua me mikun më të mirë të Epstein, me regji të një klienti të tij.
Nga dokumentet e financierit del në pah ajo që britanikja Financial Times e ka përkufizuar me të drejtë si një “Skemë Ponzi sociale”, pra një zinxhir marrëdhëniesh që shkonte nga Bill dhe Hillary Clinton te Steve Bannon, nga Noam Chomsky te Steven Pinker, duke kaluar përmes Bill Gates, Woody Allen, mbretërorëve anglezë e norvegjezë, kryeministrave dhe ambasadorëve të gjysmës së botës.
Mbeten ende shumë gjëra për t’u mësuar rreth pasojave politike, duke filluar nga roli i Trump dhe i drejtuesve të lëvizjes trumpiane, të cilët bënë shumë para duke folur për konspiracionet “pedo-sataniste” të elitës demokrate, ndërkohë që tani po zbulohen si vizitorë të rregullt të Epstein dhe shumë aktivë me të në trekëndëshin Silicon Valley-Shtëpia e Bardhë-Rusi.
Gjithsesi, këtu ka një aspekt më të përgjithshëm që më bën përshtypje. Kjo ngjarje është një eksperiment i tmerrshëm mbi natyrën njerëzore. I çliruar nga çdo shtrëngim dhe nevojë, çfarë dëshiron një njeri që ka tashmë gjithçka?
Para, seks, pushtet, në një sistem që i garanton mijëra mënyra për të shtuar pafundësisht burimet e tij dhe që e lejon të shkelë normat shoqërore, fiskale dhe penale pa guxuar askush ta denoncojë?
Përgjigja është e thjeshtë: edhe më shumë para, mënyra të reja për të shmangur taksat dhe një vend të veçuar me një ndërmjetës të shkathët për të bërë, larg syve të botës, atë gjë që është ende e ndaluar edhe për të.
Kjo është dëshmia më e mirë e nevojës për t'i vendosur frena pasurimit të pakufizuar të gjigantëve të financës dhe teknologjisë. Pasojat shihen qartë në foton e Epstein me Mark Zuckerberg dhe Elon Musk që në vitin 2015, një vit para fitores së Trump.
Lini një Përgjigje