FLASH
Shkruar nga Pamfleti
Shqipëria digjet nga kriminelët, Babloku krihet nëpër Ballkan
Skandaloze dhe tronditëse ishin pamjet që qarkulluan sot, të regjistruara dhe shpërndara nga vetë autorët e një krimi të paralajmëruar këtu e 9 vjet të shkuara, kur Edi Rama vuri përpara tepsinë e pushtetit absolut. Tronditëse, por aspak surprizuese për ata që janë të vetëdijshëm për vendin ku jetojmë. Skandaloze, njësoj si shteti që kryekrimineli Kryeministër ka ndërtuar i mbështetur nga të njëjtët kriminelë që sot shokuan Shqipërinë.
Sot, në telefonin e çdo shqiptari e më pas në çdo portal, u shpërndanë pamje të denja për një film thriller me banda e krim. Më shume se 10 meshkuj (se burra nuk e meritojnë tu thuhet) ndjekin dhe rrahin me shkopa bejsbolli e kërcënojnë me armë dy burra të paarmatosur. Ditën për diell, në një lokal ku ka edhe njerëz të tjerë. Ose thënë ndryshe ku mund të ishte duke pirë një kafe e shishe ujë çdonjëri prej nesh.
Dhe të mendosh që nuk bëhet fjalë as për konflikt mes bandash e as për kriminelë që ndiqen nga policia. Sherri është tipik për një shtet mafioz: Dy anëtarë të fisit Maja shkuan e bënë denoncim në komisariatin e Krujës për shkak se banesat e tyre ishin dëmtuar nga punimet që kryente një subjekt privat, biznes guroreje në pronësi të familjarëve të deputetit të Partisë Socialiste, Rrahman Rraja.
Vini Re, po flasim për familjen e një deputeti. Njëri nga ata që nuk e ka as për herë të parë e as për të fundit demonstrimin sheshit të lidhjes së tij me politikën dhe krimin njëkohësisht.
Majat kërkuan drejtësi. Por çfarë morën në këmbim?
Për tu treguar trimërinë e për tu dhënë mesazhin se shteti janë ata, Rrajat famëkeq sulmuan barbarisht dy burrat që bënë denoncimin dhe sulmin e filmuan nga momenti kur u nisen me automjete e derisa hynë brenda lokalit e nisën të qëllonin. Videot rrodhën më pas në grupet në Whatsapp derisa përfunduan në duart e medias.
Kur pamjet u publikuan dhe dhuna barbare doli sheshit, ra në sy kërcënimi me armë direkt nga vëllezërit deputetit të PS, Flamur e Xhelal Rraja. Një prej tyre dëgjohet në video teksa thotë “vrite vrite…” për anëtarin e fisit Maja që po e dhunonte. I plagosuri ndodhet në gjendje të rëndë në Spitalin e Traumës. Mes dhunuesve me shkopa bejsbolli ishte edhe Rexhepi, djali i deputetit të PS-së, i dënuar më parë për historinë e dhunës ndaj Xhisiela Malokut. Vajza në fjalë qe rrahur barbarisht e djegur me cigare në gjithë trupin, pak vite më parë. Edhe ajo provoi ti drejtohej policisë, por "trimoshi" i Rrajave ia mbylli gojën dhe çështja e mbyll.
Ky është shteti i Edi Ramës!
Pas publikimit të pamjeve, Policia e Shtetit u sigurua të bënte një deklaratë ku theksonte se sebep ishte një gurore që "shfrytëzohej nga familja Rraja me licence". Asnjë fjalë për dëmin dhe hallin e Majave që mund të jetë edhe i banorëve të tjerë në zonë, por që nuk ua mban të flasin.
Ky është shteti i Edi Ramës!
Pasi opinioni publik reagoi për pamjet e tmerrshme, ku njëri prej viktimave vazhdon të goditet pa mëshirë me shkop bejsbolli, edhe pasi mbetet pa ndjenja në vend, Policia e Shtetit bëri një njoftim të dytë ku thoshte se kishte shoqëruar 8 persona dhe arrestuar 4 të tjerë. Por çuditërisht vëllezërit e deputetit të PS-së nuk janë arrestuar ende. Madje as përmenden fare.
Ky pra është shteti i Edi Ramës!
Famëkeqi Rraja ka bandën e tij dhe mbrojtjen e shtetit. Ai është fuqizuar me bekimin e mikut të tij të zemrës, kryeministrit. Ai ka blerë vota e pushtet për të, prandaj Rrajat të rrahin, të vrasin e të djegin ditën për diell dhe askush nuk bëzan. Dy pjesëtarë të një familje që kërkuan ndihmën e shtetit, e pësuan, siç u pa në video. Rrajat përfshihen në konflikte të tilla dhe ngjarje kriminale në zonë, por policia nuk i prek. Xhisiela Maloku hëngri dru, por e tërhoqi denoncimin ndërsa për atentatin ndaj prokurorit të Durrësit, Arjan Ndoj, familja Rraja luajti gurë e gurore për ta mbyllur çështjen edhe pse Rramazan Rrahja u arrestua si pjesëtar në atentat.
Çfarë duhet të bënin më shumë këta kriminelë që të përfundonin të gjithë në burg?!
Ky pra është shteti i Edi Ramës!
Fisi Rraja jeton si bandë e paprekshme në zonën e Krujës e Fushë Krujës dhe fuqinë e ka nga politika dhe shteti i Bablokut që Rrahman Rrajan e ka pasur deputet të PS-së. Falë këtyre dy bashkëpunëtorëve në këtë politikë kriminale, pinjollët e Rrajave sillen si padronë të zonës duke mos pyetur për ligjin. Përballë tyre Policia e Shteti është thjeshtë e tredhur.
Ky është shteti i Edi Ramës, i këtij krykrimineli që për të mbledhur vota e mbajtur pushtetin ka ushqyer me gji sojin e Rrajave e shumë të tjerëve në gjithë Shqipërinë. Dhe paturpësisht, ndërkohë që Shqipërinë e ka marrë lumi dhe krimi e ka vënë përfund, kryekrimineli bredh me kollare nëpër Ballkan e ia thotë mendja se do të bëjë politikë ballkanike.
Bridh Bablok bridh. Një ditë krimi që ke mbjellë në këtë vend do të hajë edhe kokën tënde./Pamfleti
Lini një Përgjigje