FLASH
Shkruar nga Pamfleti
Pas Volkswagen-it, edhe Mercedes po orienton aktivitetin e saj drejt industrisë së mbrojtjes. Kompania gjermane po përgatit një bashkëpunim me një kompani të specializuar në prodhimin e dronëve. Ndërkohë, ajo ka nënshkruar një kontratë prej 1 miliard eurosh me Ministrinë e Mbrojtjes së Lituanisë për furnizimin me automjete ushtarake.
Sipas një raporti të Financial Times, Mercedes-Benz do të bashkëpunojë me startup-in Tytan Technologies, i cili prodhon dronë interceptues.
Mercedes do të furnizojë furgonët Sprinter dhe SUV-të G-Class, të cilët do të përdoren për transportimin e sistemit “Drone Defender”, një platformë mobile për lëshimin e dronëve.
Sipas raportit, ky sistem pritet të jetë më ekonomik se alternativat konkurruese dhe të vihet në dispozicion më shpejt se sistemet më komplekse të destinuara për përdorim në vijën e parë të frontit.
Tytan Technologies, e cila specializohet në zhvillimin dhe prodhimin e dronëve autonomë interceptues të kontrolluar me inteligjencë artificiale dhe bashkëpunon me Ukrainën, synon të nisë prodhimin deri në fund të këtij viti.
Nga ana e saj, drejtori ekzekutiv i Mercedes, Ola Källenius, deklaroi së fundmi për Wall Street Journal se kompania mund të zgjerojë aktivitetin e saj në sektorin e mbrojtjes, por kjo do të mbetet një fushë e veçantë dhe jo aktiviteti kryesor i saj.
Zhvillimi i sistemit të ri vjen në një kohë kur shqetësimet për sulme të mundshme me dronë ndaj infrastrukturës kritike të Gjermanisë po shtohen.
Së fundmi, Zyra Federale Gjermane për Mbrojtjen e Kushtetutës u ka bërë thirrje kompanive gjermane të marrin masa mbrojtëse kundër dronëve, pasi vitet e fundit është vërejtur një rritje e ndjeshme e pranisë së tyre, veçanërisht pranë aeroporteve dhe objekteve ushtarake.
Ndërkohë, Mercedes ka nënshkruar një kontratë me vlerë 1 miliard euro me qeverinë e Lituanisë për furnizimin e forcave të armatosura të vendit me automjete Mercedes-Benz G-Class dhe kamionë ushtarakë Unimog, Zetros dhe Arocs, të prodhuar nga Daimler Truck.
Sipas Ministrisë së Mbrojtjes së Lituanisë, marrëveshja e nënshkruar parashikon që dorëzimi i automjeteve të kryhet gradualisht nga viti 2026 deri në vitin 2032.
Lini një Përgjigje