Kronike13 Qershor 2023, 11:22

Do “zbërthente” disa vrasje, shtyhet gjyqi për Nuredin Dumanin

Shkruar nga Pamfleti
Do “zbërthente” disa vrasje, shtyhet gjyqi për Nuredin

Seanca për të penduarin e drejtësisë Nuredin Dumani është shtyrë sërish.

Mësohet se ai do të dëshmonte për disa ngjarje kriminale, të cilat i ka kryer në bashkëpunim me të kërkuarin tjetër Talo Çela, përpara se ata të krijonin konflikte me njëri-tjetrin.

Bëhet me dije se para se të konfliktoheshin, ata kanë bashkëpunuar për disa atentate në qytetin e Elbasan dhe për një vrasje në qytetin Durrësit, ku Dumani ka treguar se këto ngjarje i ka kryer në bashkëpunim me Talo Çelën.

Prokuroria ka siguruar prova të reja në lidhje me këto ngjarje dhe për këtë arsye i ka kërkuar gjykatës edhe disa ditë të tjera kohë për të verifikuar dëshminë e Dumanit me provat e gjetura.

Seanca e radhës gjyqësore është caktuar më 21 qershor në orën 09:00.

Kujtojmë se, më 30 maj, Dumani u thirr në gjykatë për të dëshmuar për procesin ndaj, Altin Ndocit, Klevis Allës, Besian Xhixhës dhe Enver Divës, por nuk pranoi të fliste. Këta persona akuzohen për vrasjen e Viktor dhe Bermir Haxhia, si edhe Dorian Shkozës e Anxhelo Avdisë.

Më herët, i penduari tjetër i drejtësisë, Klevis Alla dëshmoi në lidhje me vrasjes e vëllezërve Haxhia, ku tregoi se vrasjen e kreu Dumani me një person tjetër, ndërsa ai ka qenë vetëm shofer.

Ndërsa në lidhje me vrasjen e Dorian Shkozës dhe Anxhelo Avdisë ka dëshmuar edhe Henrik Hoxhaj, i cili ka treguar se Dumani përgatiti gjithçka për 35 mijë euro.

Kush është Nuredin Dumani?

Nuredin Dumani është një emër shumë i njohur për policinë. Emri i tij u lakua në tetor të vitit 2020, kur ai u shpall në kërkim si autor i vrasjes së Bujar Çelës, vëllai të Talo Çelës. Ai është autor i dyshuar edhe për vrasjen e vëllezërve Haxhia në Durrës, ngjarje kjo e kryer në bashkëpunim me Talo Çelën, sipas Policisë dhe dy personave të tjerë.

Autorësia e tyre në këtë ngjarje është dëshmuar nga i penduari i drejtësisë, Klevis Alla, ndërsa dy vëllezërit Besmir dhe Viktor Haxhia u vranë pasi akuzoheshin se nuk i kishin kthyer një shumë të konsiderueshme parash që kishin lënë në servisin e tyre.

Vëllezërit Haxhia, gjithmonë sipas dëshmisë së Klevis Allës, kanë deklaruar se paratë i kanë humbur në muajin janar të këtij viti, kur servisi i tyre ra pre e vjedhjes, ku i morën edhe materiale dhe nuk kishin asnjë mundësi për t’i kthyer pas. Dumani është shok me Klevis Kapllanin, i ekzekutuar me 14 plumba më 15 shtator.

Ai akuzohet edhe si organizator i vrasjes së Dorjan Shkozës dhe Anxhelo Avdylit, në 2 mars 2020. Po ajo që bie më shumë në sy është se në vrasjen e katër të rinjve në Durrës, Dumani ka bashkëpunuar së bashku me Talo Çelën, ndërsa së fundmi ai akuzohet për vrasjen e vëllait të tij

Nuredin Dumani gjithashtu mësohet se ka qenë i lidhur me një rrjet prostitucioni që doli në dritë pas denoncimit të një vajze nga Durrësi e trafikuar në Francë. Sipas dëshmisë së saj, Dumani ishte tutori i rrjetit, që i mashtronte vajzat duke u propozuar për martesë dhe në rast refuzimi i kërcënonte se do të vriste familjarët e tyre. Po ashtu, Nuredini ka qenë i arrestuar më herët edhe për akuzën e vjedhjes.

Dumani, i dyshuar edhe për vrasjen e shokut të tij në Rrogozhinë.

Sipas informacioneve të Policisë së Elbasanit, Nuredin Dumani dyshohet se është i implikuar edhe në vrasjen e shtetasit Klevis Kapllani, me të cilin kishte njohje të hershme dhe shoqëroheshin bashkë. Gjithashtu mësohet se Nuredin Dumani dhe Klevis Kapllani janë nga i njëjti fshat, Sinaballaj, dhe para se Dumani të shpallej në kërkim nga Policia për ngjarjet kriminale, ata shoqëroheshin bashkë në publik.

Burime nga Policia bënë të ditur se Kapllani ka qenë i dënuar dy herë në Itali, si shpërndarës droge. Por tashmë Nuredin Dumani rezulton i shpallur në kërkim nga Prokuroria e Durrësit, pasi akuzohet se është i implikuar edhe në dy ngjarje të rënda në Durrës, me një bilanc prej 4 viktimash, Besmir Haxhia, Viktor Haxhia, Dorjan Shkoza dhe Anxhelo Avdyli, ngjarje të ndodhura në muajin mars dhe maj të këtij viti.

Për këtë ngjarje në kërkim është dhe Talo Çela, i cili së bashku me Nuredin Dumanin përmenden në dëshminë e të arrestuarit për atentatin e vëllezërve Haxhia, Klevis Alla.

nuredin dumani seance vrasje