Politike 9 Dhjetor 2023, 18:01

Ambasadori britanik “goditje” Berishës/ Thirrje SPAK-ut të mos tolerojë asnjë, paralajmëron të tjerë “non grata” nga Londra

Shkruar nga Pamfleti
Ambasadori britanik “goditje” Berishës/ Thirrje SPAK-ut të
Berisha dhe ambasadori britanik

Ambasadori i dha mbështetje SPAK që të vijojë me hetimet ndaj gjithë të korruptuarve, duke sfiduar Berishën që akuzon prokurorinë se hetimet ndaj tij janë politike...

Ambasadori i Mbretërisë së Bashkuar në Shqipëri, Alastair King-Smith ka lëshuar mesazhe të forta sa i takon të korruptuarve në Tiranë.

Në një intervistë, King-Smith u ndal te Sali Berisha. Teksa sqaroi arsyet përse Mbretëria e Bashkuar vendosi të shpallë non grata ish-kryeministrin, ai paralajmëroi se do të ketë masa të ngjashme edhe në të ardhmen. Nga ana tjetër, ambasadori i dha mbështetje SPAK që të vijojë me hetimet ndaj gjithë të korruptuarve, duke sfiduar Berishën që akuzon prokurorinë se hetimet ndaj tij janë politike.

Ne mbështesim tërësisht sistemin gjyqësor të Shqipërisë, në veçanti institucione si SPAK. Nuk komentojmë rastet individuale, por ajo që mund të them është se jemi të angazhuar të pengojmë lidhjet mes kriminalitetit, korrupsionit dhe politikës. Do të marrim masa kur ta konsiderojmë të përshtatshme”, tha ai.

Deklarata e ambasadorit është një goditje ndaj ish-kryeministrit, i cili e ka sulmuar shumë herë diplomatin britanik në Tiranë.

I ftuar në podkastin “Inside Albania” nga gazetarja Alice Taylor, diplomati britanik zbuloi edhe një sërë projektesh në të cilat ambasada është e përfshirë për të ndihmuar ekonomikisht zonat veriore të Shqipërisë, ku fenomeni i largimit të të rinjve, sidomos drejt Mbretërisë së Bashkuar, është më i theksuar.

Kemi ngritur disa qendra sipërmarrjeje për të rinjtë. Kemi hapur një në Kukës, do të ketë edhe të tjera, në Dibër. Do të nisim programe me shkollat. Sigurojmë gjithashtu grante për bizneset e vogla, që individët të hapin biznese dhe të marrin njerëz në punë”, tha ai.

Ambasadori komentoi shifrat e emigracionit të paligjshëm nga Shqipëria drejt Mbretërisë së Bashkuar. Krahasuar me 2022, niveli i tyre gjatë këtij viti ka rënë me 90%.

Apeli im për çdo të ri që mendon të ikë ilegalisht, është të mos e bëjnë. Ka mënyra të ligjshme për të shkuar në Mbretërinë e Bashkuar. Kemi hapur një qendër aplikimesh për viza në veri për të lehtësuar ikjen dhe për të treguar se jemi të hapur për punë”, vijoi ambasadori. 

Ambasadori ndau disa detaje nga dokumentet e rëndësishme që Ministri i Brendshëm, Taulant Balla nënshkroi në Londër, pas takimit me homologun britanik, James Cleverly.

Është një pjesë shumë e rëndësishme e marrëveshjes tonë, brenda kontekstit të Komunikatës së Përbashkët që dy kryeministrat tanë nënshkruan vitin e kaluar. Deklarata e bashkëpunimit nënkupton se do të ketë shkëmbime, operacione policore, do të intensifikojmë atë që bëjmë përmes task forcës së emigracionit, do të shohim si mund të mbështesim transformimin brenda Policisë. Ne tashmë e shohim Policinë e Shtetit si një partner të mirë për të bashkëpunuar”, tha ai.