Politike 5 Dhjetor 2023, 22:09

Kërcënon Oerd Bylykbashi: Parlamenti, një gotë e vogël krahasuar me gjithë atë zhvillim që do të ketë opozita

Shkruar nga Pamfleti

Kërcënon Oerd Bylykbashi: Parlamenti, një gotë e vogël

Deputeti i PD-së Oerd Bylykbashi ka komentuar kaosin e shkaktuar në Kuvend, teksa ka deklaruar se aksioni opozitar do të vazhdojë deri sa të plotësohet kërkesa për ngritjen e komisioneve hetimore.

Sipas tij, këto komisione hetimore nuk i zgjidhin problemet që ka aktualisht sot Shqipëria por ato janë funksioni thelbësor i Parlamentit.

Më tej ai shtoi se ndërkombëtarët i kanë bërë thirrje mazhorancës që të bëjë hapin tjetër por qeveria ka refuzuar.

“Kur dy palët kanë të drejtë, 50 me 50, si mazhoranca dhe opozita, ndërkombëtarët si rregull i kërkojnë qeverisë që të bëjë hapin tjetër.

Është shumë e pritshme dhe sinjalet e para erdhën, ata i kërkojnë Ramës  që të ngrejë hetimore, sepse ato janë, siç e tha ambasadori gjerman, janë funksion thelbësor i parlamentit, kontrolli parlamentar është funksion kryesor.

Që do të thotë se kanë hyrë në lojë, se sa më larg do të shkojë kjo situatë, do të shpërthejë.

Në vende si Shqipëri, ndërkombëtarët ndërhyjnë për të kanalizuar krizën, drejt diçkaje normale. Problemi është se edhe ngritja e komisioneve, apo rikthimi i të drejtës tonë në komisionin e reformës zgjedhore, nuk i zgjidh problematikat.

Nuk do ta zgjidhë një komision, problemin e shitblerjes së votës, edhe pse vota këtu ka vdekur, sepse e kanë blerë që më përpara dhe në kuti shkon për tu varrosur.

Duhet që tronditja të jetë e fortë përpara, që kur të vijmë në zgjedhje, siç ndodhi në vitin 2005, të jetë një situatë normale, ku vota bën diferencën.

Sot kjo situatë është anormale.

Parlamenti është një gotë e vogël për të përmbajtur gjithë atë zhvillim që do të ketë opozita”, tha Oerd Bylykbashi në “SYRI TV”.

oerd bylykbashi aksioni opozitar