FLASH
Shkruar nga Pamfleti
Kryeministri kundërshtoi akuzat që lidhen me Arubën dhe tha se pretendime të pabazuara po paraqiten si të vërteta në hapësirën publike…
Kryeministri Edi Rama përdori mbledhjen e grupit parlamentar socialist për t'iu përgjigjur sërish analistit Fatos Lubonja, i cili prej kohësh ka kërkuar sqarime lidhur me të ashtuquajturin “takim në Aruba”.
Gjatë fjalës së tij, Rama e cilësoi të papranueshme që ndaj tij të ngrihen akuza pa prova dhe u ndal veçanërisht te qëndrimet e Lubonjës. Kryeministri tha se analisti po sillet me të njëjtën qasje që, sipas tij, u përdor dikur kundër vetë Lubonjës gjatë procesit që çoi në burgosjen e tij në periudhën komuniste.
Sipas Ramës, në historinë e sistemeve juridike akuzat mbështeten mbi fakte dhe prova konkrete. Ai përsëriti se nuk ka qenë asnjëherë në Aruba dhe se nuk ka dërguar askënd atje, duke shtuar se mohimet e tij nuk po merren në konsideratë nga ata që vazhdojnë të përhapin këtë pretendim.
Kryeministri argumentoi se historia e Arubës është shndërruar në një narrativë që qarkullon gjerësisht në rrjetet sociale dhe në debatin publik, pavarësisht mungesës së provave që, sipas tij, do ta mbështesnin atë.
Në vijim të deklaratës, Rama përmendi edhe akuza të tjera që, sipas tij, janë kthyer në pjesë të diskursit publik pa pasur bazë faktike. Ai foli për pretendimet që e lidhin me përdorimin e kokainës, si dhe për akuza që kanë përfshirë familjen e tij. Sipas kreut të qeverisë, përsëritja e vazhdueshme e këtyre pretendimeve ka bërë që ato të perceptohen nga një pjesë e opinionit si të vërteta.
Rama tha se fenomeni i përhapjes së informacionit në epokën e algoritmeve favorizon krijimin e versioneve alternative të realitetit, ku një pretendim mund të marrë statusin e faktit edhe kur nuk mbështetet nga prova.
Deklaratat e kryeministrit vijnë në një moment kur debati për çështjen e Arubës vijon të rikthehet herë pas here në përplasjet politike dhe mediatike, ndërsa Rama ka mohuar vazhdimisht çdo lidhje me pretendimet e ngritura ndaj tij.
Nje nga ata qe firmosi per vrasjen me akuza te rreme ishte Kristaq Rama!