Shkruar nga Pamfleti
Nënkryetari i LDK-së, Lutfi Haziri ka deklaruar se veriu i Kosovës rrezikon që të vendoset në një administrim ushtarak dhe civil për shkak të sjelljes së qeverisë Kurti.
Në një intervistë për “Abc News”, ai tha se qeveria e ka humbur legjitimitetin dhe kjo sipas tij, dëshmohet edhe me shtimin e forcave të KFOR-it.
“Qeveria që po sillet në këtë formë, tregon qartë se nuk ka asnjë plan se si të dilet nga kjo situatë. Nuk kemi axhendë në mbajtjen e zgjedhjeve në katër komunat e veriut, nuk kemi plan detaj për përfundimin e bojkotit të serbëve në këto komuna, nuk kemi mënyrë se si të menaxhojmë situatat eventuale në rrethanat e përkeqësimit, dhe në anën tjetër kemi rritjen e KFOR-it.
Kanë marrë autorizime të reja pa pyetur askënd dhe krahas ushtrimit të detyrave në siguri, zëvendësojnë edhe rolin e policisë speciale në rrethana që mund të përkeqësohen. Praktikisht as zoti Kurti dhe ministrat e tij nuk mund të shkojnë në asnjë komunë në veri pa lejen e KFOR-it.
Dhe në emër të sovranitetit, ata kanë humbur një lloj legjitimiteti për ushtrimin e detyrave të rregullta ditore si përfaqësues të ekzekutivit. Rreziku më i madh është që ai vend potencialisht të vendoset në një administrim ushtarak dhe civil dhe të shkëputet roli i qeverisë së Kosovës sepse nervozizmi i djeshëm i Kurtit, paqartësia e tij dhe mënyra se si gjen fajtor në Bruksel për mossuksesin në bisedime tregon qartë që po e përkeqëson krejt rolin tonë në ushtrimin e sovranitetit në këto katër komuna në veri të Kosovës”, theksoi Haziri.
Haziri theksoi se opsioni më real për të dalë nga ngërçi në të cilin e ka futur Kosovën Albin Kurti janë zgjedhjet e parakohshme.
“Përderisa opozita nuk ka mundësi me organizuar mocion për rrëzimin e qeverisë atëherë shpërbërja me marrëveshje mund të jetë një opsion ose dorëheqja e kryeministrit. Në asnjë rrethanë ku VV ka rol për të zhbllokuar situatën, ata nuk marrin pjesë. Në politikën e brendshme kemi dështim total, në ekonomi, çështjet sociale, arsimi, shëndetësia janë bllokuar.
Mund ta barazojmë dështimin e brendshëm dhe me dështimin në dialog dhe nuk ka perspektivë. Opsioni i zgjedhjeve të hershme mbetet opsioni më real për të dalë nga kjo situatë”, theksoi ai.
