FLASH
Shkruar nga Pamfleti
Moderatorja Arbana Osmani, ka ndarë me ndjekësit e saj në Instagram një reflektim të sinqertë personal, duke zbuluar një “peng” që e ka shoqëruar vitet e fundit dhe vendimin që ka marrë për ta ndryshuar.
Përmes një InstaStory, Arbana ka treguar se për këtë vit i ka vendosur vetes një qëllim të ri, i cili nuk lidhet me angazhimet televizive, por me pasurimin e mendjes dhe shpirtit. Ajo pranon se kohët e fundit nuk ka lexuar aq sa do të donte, gjë që i ka lënë një shije të hidhur.
“Këtë vit i kam vënë qëllim vetes të lexoj të paktën një libër në muaj, sepse është një nga pengjet e viteve të fundit dhe më vjen shumë keq,” shkruan Osmani.
Moderatorja zbulon se aktualisht po fokusohet te autorët e rinj shqiptarë, veprat e të cilëve i cilëson si mbresëlënëse. “Kam lexuar disa libra shumë të mirë këto kohë, të gjithë të shkruar nga autorë të rinj shqiptarë, mbresëlënës,” shprehet ajo.
Ky pasion i ri nuk do të mbetet vetëm personal, por do të reflektohet edhe në projektin e saj televiziv. Arbana bën të ditur se disa prej këtyre autorëve i ka intervistuar tashmë për emisionin “Mirëmbrëma Yje”, ku publiku do t’i zbulojë në episodet në vijim.
Në fund, ajo bën një apel të drejtpërdrejtë për publikun, duke theksuar rëndësinë e vlerave të vërteta kulturore. “Ndjej se duhet folur më shumë për librat dhe se letërsia e mirë duhet bërë ‘virale’,” përfundon Arbana.
Lini një Përgjigje