FLASH
Shkruar nga Pamfleti
Dy protagonistët e dokumentarit të Netflix "Skywalkers: A Love Story", Angela Nikolau dhe Ivan "Vanya" Beerkus, janë arrestuar pasi u ngjitën ilegalisht në majë të Empire State Building në Nju Jork, ku realizuan një propozim martese spektakolar.
Ngjarja ndodhi më 1 korrik, kur çifti, i veshur me të zeza, u ngjit në majën e antenës së ndërtesës, rreth 443 metra mbi tokë. Pamjet e transmetuara nga helikopterët e mediave i treguan duke qëndruar mbi strukturën metalike pa u dukur të lidhur me pajisje sigurie.
Në majë të kullës ata shpalosën një pankartë me mesazhin: "Kur fuqia e dashurisë mposht dashurinë për pushtetin, bota njeh paqen."
Më pas, Nikolau dhe Beerkus u panë duke u puthur, duke bërë fotografi dhe selfie, ndërsa në një platformë më të gjerë Ivan Beerkus u ul në një gju dhe i propozoi martesë partneres së tij. Momenti u bë menjëherë viral në rrjetet sociale, ndërsa vëmendje tërhoqi edhe maska e zezë e Angela Nikolaut, që u krahasua nga shumë përdorues me personazhin Catwoman.
Pas zbritjes, efektivët e Policisë së Nju Jorkut i arrestuan të dy pa incidente. Autoritetet nuk kanë sqaruar ende se si çifti arriti të depërtonte në zonën e kufizuar të antenës së Empire State Building, por kanë konfirmuar se ndaj tyre pritet të ngrihen akuza.
Angela Nikolau dhe Ivan Beerkus njihen në mbarë botën si pjesë e komunitetit të "rooftoppers", aventurierë që ngjiten ilegalisht në rrokaqiej dhe struktura shumë të larta pa përdorur pajisje sigurie.
Historia e tyre u bë e njohur për publikun e gjerë përmes dokumentarit të Netflix "Skywalkers: A Love Story" (2024), i cili rrëfen marrëdhënien e çiftit dhe aventurat e tyre ekstreme në disa nga ndërtesat më të larta në botë.
Lini një Përgjigje