FLASH
Shkruar nga Pamfleti
Algjeria ka vendosur masa të rrepta sigurie në bazën e saj stërvitore në Lawrence, Kansas, ku po përgatitet për Kupën e Botës 2026. Aksesi në stërvitje është ndaluar për mediat dhe tifozët, ndërsa çdo fotografim apo regjistrim video nga persona jashtë delegacionit është i ndaluar.
Megjithatë, pavarësisht këtyre kufizimeve, një rrjet televiziv lokal në Kansas, KMBC 9, i lidhur me ABC, arriti të sigurojë pamje nga qendra stërvitore duke përdorur dronë. Publikimi i këtyre imazheve shkaktoi reagime të forta në kampin algjerian, ku pjesë e skuadrës është edhe portieri Luca Zidane.
Federata Algjeriane e Futbollit e cilësoi incidentin si një shkelje të privatësisë së ekipit. Sipas saj, që prej mbërritjes në Shtetet e Bashkuara janë zbatuar masa të veçanta sigurie për të mbrojtur përgatitjet e skuadrës dhe për të kufizuar çdo akses të paautorizuar në ambientet stërvitore.
Në kuadër të kësaj politike, edhe ndeshja miqësore ndaj Bolivisë u zhvillua me dyer të mbyllura dhe pa transmetim televiziv. Trajneri i Bolivisë, Oscar Villegas, deklaroi se vendimi nuk kishte lidhje me skuadrën e tij. Burime pranë Federatës Algjeriane të Futbollit theksuan se mungesa e transmetimit nuk lidhej me ndonjë përpjekje për të fshehur informacione nga kundërshtarët e ardhshëm, përfshirë Argjentinën e drejtuar nga Lionel Scaloni, por me protokollet e sigurisë të vendosura në qendrën stërvitore.
Algjeria e fitoi ndeshjen ndaj Bolivisë me rezultatin e thellë 4-0, por pavarësisht përpjekjeve për të ruajtur konfidencialitetin e punës së ekipit, disa detaje dolën në publik.
Pas takimit, portieri bolivian Carlos Lampe ironizoi nivelin e sekretizmit që rrethonte skuadrën algjeriane. Në një prononcim për TyC Sports, ai analizoi edhe lojën e kundërshtarit.
“Algjeria është një kundërshtar që nuk ushtron mirë presion. Në momentin që duhet të mbrojë, duket disi e ngurtë dhe mbështetet shumë te kundërsulmi”, deklaroi Lampe.
Mes pamjeve të siguruara nga dronët e televizionit lokal dhe analizave të bëra publikisht nga futbollistët kundërshtarë, përpjekjet e Algjerisë për të mbajtur të fshehta përgatitjet e saj duket se janë bërë më të vështira.
Lini një Përgjigje