FLASH
Shkruar nga Pamfleti
Organizatat e konsumatorëve dhe tifozëve akuzojnë FIFA-n për abuzim me pozitën dominuese dhe mungesë transparence në shitjen e biletave
Organizata evropiane e konsumatorëve Euroconsumers, së bashku me Football Supporters Europe, kanë paraqitur një ankesë pranë Komisionit Evropian, duke akuzuar FIFA-n për abuzim me monopolin e saj në shitjen e biletave për Kupën e Botës.
Sipas dokumentit të siguruar nga Politico, ankesa pretendon shkelje të Nenit 102 të Traktatit për Funksionimin e Bashkimit Evropian, i cili ndalon abuzimin me pozitën dominuese në treg.
“FIFA ka një monopol të plotë mbi shitjen e biletave për Kupën e Botës,” deklaroi Romane Armangau, zëdhënëse e Euroconsumers, duke shtuar “kjo fuqi po përdoret për të vendosur çmime që nuk do të ekzistonin në një treg konkurrues, ndërsa informacioni për blerësit është i kufizuar dhe vendimet nxiten në mënyrë të shpejtuar.”
Organizatat evidentojnë disa praktika që i konsiderojnë abuzive, përfshirë mungesën e transparencës për kategoritë e biletave dhe vendet në stadium, një sistem çmimesh të ndryshueshme që rrit koston me kalimin e kohës, si dhe mungesën reale të biletave të reklamuar me çmim fillestar prej 60 dollarësh.
“Kur blen një biletë, në fakt nuk e di saktësisht çfarë po blen”, tha Armangau, duke shtuar se ndjekja e Kupës së Botës 2026 është bërë financiarisht e papërballueshme për shumicën e tifozëve, pasi çmimet për finalen nisin nga mbi 4,000 dollarë.
Sipas ankesës, tifozët përballen edhe me kosto shtesë, si tarifa rishitjeje rreth 15 për qind. Gjithashtu, FIFA akuzohet për përdorimin e “modeleve të errëta”, teknika dizajni dhe marketingu që krijojnë ndjesi urgjence artificiale për të nxitur blerjen.
Ankesa vjen në një kohë kur presioni ndaj FIFA-s në Bruksel po rritet. Në një intervistë për Politico më herët këtë muaj, Komisioneri Evropian për Sportin, Glenn Micallef, paralajmëroi për rreziqe sigurie për tifozët që do të udhëtojnë për Kupën e Botës 2026, duke përmendur shqetësime të lidhura me luftën në Iran. Ai theksoi se FIFA ende nuk ka dhënë garanci të reja për sigurinë e tifozëve.
Micallef kritikoi gjithashtu partneritetin e FIFA-s me “Board of Peace” të presidentit amerikan Donald Trump, që në Evropë shihet si një përpjekje për të anashkaluar Kombet e Bashkuara.
Ankesa mbështetet edhe në një vendim gjyqësor të dhjetorit 2023 mbi Super League, i cili përcakton se FIFA dhe UEFA mund të jenë subjekt i ligjit të konkurrencës së BE-së kur organizojnë dhe tregtojnë aktivitete me karakter ekonomik. Sipas paditësve, kjo logjikë vlen edhe për shitjen e biletave të Kupës së Botës.
Euroconsumers dhe partnerët e saj i kërkojnë Komisionit Evropian të ndërhyjë, duke përfshirë vendosjen e kufijve të çmimeve dhe rritjen e transparencës në procesin e shitjes.
“Po i kërkojmë Komisionit të veprojë menjëherë me masa të përkohshme,” tha Armangau, duke shtuar se “pasi ndeshjet të zhvillohen, dëmi për tifozët nuk mund të zhbëhet.”
Lini një Përgjigje