FLASH
Shkruar nga Pamfleti
Ngjarjet që shoqëruan fundin e finales së Kupës së Botës mes Spanjës dhe Argjentinës kanë kaluar tashmë në fokusin e FIFA-s. Organi qeverisës i futbollit botëror ka nisur zyrtarisht një procedim disiplinor për incidentet e ndodhura pas vërshëllimës përfundimtare të arbitrit.
Në një deklaratë zyrtare, FIFA bëri të ditur se ka emëruar një Prokuror Disiplinor dhe Etik për të hetuar shkeljet e mundshme të Kodit Disiplinor të FIFA-s, në përputhje me nenin 36.
Në qendër të hetimit pritet të jetë mesfushori argjentinas Leandro Paredes. Pasi ishte ndëshkuar me karton të verdhë gjatë takimit, ai u përjashtua me karton të kuq pas një përplasjeje me Gavin, teksa futbollistët spanjollë po festonin fitimin e titullit botëror.
Nën hetim është edhe mbrojtësi Nahuel Molina, i cili dyshohet se goditi me grusht Rodrin, ndërsa kapiteni i Spanjës po shkonte drejt shokëve të skuadrës për të festuar triumfin. Incidenti u përshkallëzua në një përleshje ku u përfshinë futbollistë të të dyja skuadrave, si edhe anëtarë të stafit teknik të Argjentinës.
Sipas raportimeve, në konflikt është përfshirë edhe ndihmëstrajneri Roberto Ayala, ish-mbrojtësi i Argjentinës, Napolit dhe Milanit, i cili dyshohet se ka goditur me grusht Dani Olmon.
Hetimi i FIFA-s do të përcaktojë përgjegjësit individualë për incidentet, ndërsa ndaj lojtarëve dhe zyrtarëve të përfshirë mund të merren masa disiplinore, përfshirë pezullime dhe sanksione të tjera.
Mos i lini te lozin me futboll keta kanibale!